پرنٹ میڈیا کے اشتہارات کے نرخوں میں 35فیصد اور حجم میں بھی اضافہ کیا جائے گا،پرنسپل انفارمیشن آفیسر

اسلام آباد(پ ر)پرنسپل انفارمیشن آفیسر محمد عاصم نے کہا ہے کہ پرنٹ میڈیا کو درپیش تمام مسائل کا بخوبی ادراک ہے، ان مسائل کے خاتمے کیلئے اشتہارات کے نرخوں میں 35فیصد اضافے اور اشتہارات کے حجم میں اضافے سمیت ہر ممکن اقدامات کیے جائیں گے

اس امر کا اظہار انہوں نے سی پی این ای کے طرف سے ان کے اعزاز میں دیئے گئے عشائیے میں کیا۔

اس موقع پر سی پی این ای کے بانی صدر خوشنود علی خان، کنونیئر اسلام آباد ممتاز حسین بھٹی(ایڈیٹر روزنامہ دن)، سید تبسم عباس شاہ (ایڈیٹر روزنامہ صدائے سچ)، عقیل ترین(ایڈیٹرروزنامہ غزنوی)، زاہد فاروق ملک(ایڈیٹر روزنامہ میٹرو واچ)،حسن وقار تراب (ایڈیٹر روزنامہ جہان)، جعفر علی بلتی(ایڈیٹر روزنامہ سلام گلگت)، ظہیر بخاری(ایڈیٹر روزنامہ انکشاف)، رائو احسان (روزنامہ سرمایہ) اور دیگر ممبران نے پرنسپل انفارمیشن آفیسر، ڈپٹی ڈائریکٹر جنرل طاہرہ سعیدہ، ڈائریکٹر اشتہارات محمد صالح اور دیگر مہمانوں کو خوش آمدید کہا۔

اس موقع پر سی پی این ای ممبران کی طرف سے انہیں میڈیا انڈسٹری کو بحران سے نکالنے کیلئے اشتہارات کے ریٹس میں 25فیصد اضافے کے حوالے سے وزارت اطلاعات کے وعدے اور اشتہارات کے حجم میں اضافے ، ڈیجیٹل اشتہارات اخبارات کی ویب سائٹس، سوشل میڈیا پیجز کیلئے کرنے کا مطالبہ کیا جس پر انہوں نے یقین دہانی کروائی کہ جو اخبارات ڈیجیٹل اشتہارات کی شرائط و ضوابط کو پورا کریں گے انہیں ڈیجیٹل اشتہارات جاری کیے جائیں گے، اس وقت اشتہارات کا حجم کم ہے، ملک میں معاشی بحران بھی چل رہا ہے لیکن اس کے باوجود وزارت اطلاعات و نشریات کی کوشش ہے کہ اشتہارات کے حجم میں اضافے سمیت تمام تر اقدامات کیے جائیں گے ۔