نیتن یاہو نے انتخابات سے قبل تل ابیب پر جوہری حملے کی اے آئی تصویر شیئر کر دی

تل ابیب (صداۓ سچ نیوز) اسرائیلی وزیرِاعظم نیتن یاہو نے انتخابات سے 2 روز قبل تل ابیب پر جوہری حملے کے نتیجے میں دھماکے کی مصنوعی ذہانت (اے آئی) سے تیار کردہ تصویر شیئر کر دی۔

گزشتہ روز نیتن یاہو نے سوشل میڈیا پلیٹ فارم ایکس پر پوسٹ شیئر کی، جس میں دائیں بازو کے سیاسی مبصر یووال بلومبرگ کے بیانات بھی شامل تھے۔

ان بیانات میں ایران کی جانب سے اسرائیل کو لاحق خطرے سے خبردار کیا گیا تھا۔

پوسٹ میں انہوں نے لکھا ہے کہ ریاستِ اسرائیل کو حقیقی اور ٹھوس خطرہ لاحق ہے، اگر ایرانیوں نے جوہری ہتھیار حاصل کر لیے تو پھر کچھ بھی پہلے جیسا نہیں رہے گا۔

اسرائیلی وزیرِ اعظم نے حکومت کے گرد جاری تنازعات کو ایک بہت بڑے دھویں کے پردے سے تشبیہ دی اور کہا کہ ان کا مقصد اس مسئلے کو چھپانا ہے جو اہمیت کے اعتبار سے باقی تمام معاملات پر کہیں زیادہ بھاری ہے۔

پوسٹ میں کہا گیا ہے کہ اگر ملک کے وسط میں 2 ایٹم بم گرتے ہیں تو ان تمام مصنوعی تنازعات کی پرواہ کون کرے گا؟

نیتن یاہو نے مؤقف اختیار کیا ہے کہ ایران میں کارروائی مکمل کرنے کے لیے اسرائیل کے پاس امریکی صدر ڈونلڈ ٹرمپ کی صدارت کے مزید 2 سال موجود ہیں۔

انہوں نے کہا ہے کہ اگر ہم اس تاریخی موقع سے فائدہ اٹھانے میں ناکام رہے تو آنے والی نسلیں ہمیں کبھی معاف نہیں کریں گی۔

نیتن یاہو نے پوسٹ میں یہ بھی کہا ہے کہ اس مشن کو ایسا وزیرِاعظم مکمل نہیں کر سکتا جو ٹرمپ کو فون کر کے ان سے مسلسل اور قریبی گفتگو نہ کر سکے یا ٹی وی انٹرویو کے دباؤ کا سامنا نہ کر سکے۔

اسرائیلی وزیرِ اعظم نیتن یاہو کی پوسٹ سامنے آتے ہی یَشار پارٹی کے سربراہ گادی آئزن کوٹ اور ڈیموکریٹس پارٹی کے سربراہ یائیر گولان نے نیتن یاہوں کو شدید تنقید کا نشانہ بنایا ہے۔

نیتن یاہو نے خوف پھیلانے کا راستہ اختیار کیا: گادی آئزن کوٹ

سوشل میڈیا پلیٹ فارم ایکس پر گادی آئزن کوٹ نے نیتن یاہو کی پوسٹ کا جواب دیتے ہوئے لکھا ہے کہ نیتن یاہو! آپ شدید اضطراب کا شکار ہیں، ہر انتخابی مہم کی طرح اس بار بھی جھوٹ اور خوف پھیلانے کا وہی پرانا طریقہ اپنایا جا رہا ہے، اس مرتبہ اسرائیلی شہریوں کو بڑے پیمانے پر تباہی کی دھمکیاں دی جا رہی ہیں اور یہ سب ایران کے خلاف جنگ کے مقاصد حاصل کرنے میں آپ کی ناکامی کے بعد ہو رہا ہے۔

انہوں نے کہا کہ مکمل فتح کے وعدوں سے آپ اب اس مؤقف تک آ پہنچے ہیں کہ ہم ہتھیار نہیں ڈالیں گے، پوری کہانی بس یہی ہے، آپ ناکام ہو چکے ہیں اور دو روز بعد اسرائیل کے عوام بیلٹ باکس کے ذریعے آپ کو یہ دکھا دیں گے، ہم اگلی حکومت تشکیل دیں گے اور اسرائیل کو سلامتی اور خوش حالی کی جانب لے جائیں گے۔

وزیرِاعظم کو سوشل میڈیا سے دور رکھا جائے: یائیر گولان

ایکس پر یائیر گولان نے بھی نیتن یاہو کو تنقید کا نشانہ بنایا اور لکھا کہ میری درخواست ہے کہ نیتن یاہو کو سوشل میڈیا سے دور رکھا جائے، وہ اور ان کے اردگرد موجود لوگ اپنا توازن کھو چکے ہیں، دباؤ بڑھتا جا رہا ہے۔

انہوں نے کہا کہ منگل کو ہم خوف و ہراس پھیلانے والوں کو اقتدار سے ہٹا دیں گے اور اسرائیل میں سلامتی اور عقل و اعتدال کو واپس لائیں گے۔