بیرسٹر افتخار گیلانی نے بطور وزیراعظم آزاد کشمیر حلف اٹھا لیا

مظفر آباد (صداۓ سچ نیوز) مسلم لیگ ن کے بیرسٹر افتخار گیلانی نے بطور وزیراعظم آزاد کشمیر حلف اٹھا لیاہے جبکہ قائم مقام صدر آزاد کشمیر چوہدری طارق فاروق نے بھی عہدے کا حلف لیا۔

تفصیلات کے مطابق  وزیراعظم آزاد کشمیر بیرسٹر افتخار گیلانی نے عہدے کا حلف اٹھانے کے بعد خطاب کرتے ہوئے کہا کہ  ہم سب مل کر چلیں گے، ایک ایساآزاد کشمیر بنائیں گے جس کی مثال پوری دنیا دے گی۔

انہوں نے کہا کہ ہمارا چھوٹا سا خطہ ہے،گورننس کے مسائل ہیں، روزگار کی فراہمی یقینی بنانے کیلئے تمام اقدامات کریں گے، ہمیں اپنے ہسپتالوں کو بہتر کرنے کی ضرورت ہے، ہماری حکومت میں آزاد کشمیر کی تعمیر و ترقی کی مثال دی جائے گی۔

آزاد جموں کشمیر قانون ساز اسمبلی کا اجلاس اسپیکر چوہدری طارق فاروق کی صدارت میں ہوا، جس میں نئے وزیراعظم کا انتخاب کیا گیا۔

مسلم لیگ (ن) کے بیرسٹرافتخار گیلانی نے 30ووٹ حاصل کیے جبکہ ان کے مدمقابل پیپلزپارٹی کے امیدوار کو سردار مختارخان نے 14ووٹ ملے۔

مسلم لیگ (ن) کے اسپیکر اور ڈپٹی اسپیکر کو 32،32 ووٹ پڑے تھے تاہم بیرسٹر افتخار گیلانی کو 2 ووٹ کم پڑے، ن لیگ آزاد کشمیر کے صدر شاہ غلام قادر بھی اجلاس میں شریک نہیں ہوئے۔

نومنتخب وزیراعظم آزاد کشمیر افتخار گیلانی نے کہا کہ حکومت عوام کی ہوگی، یہ دور کشمیر کے عوام کا دور ہوگا، یہ ریاست کا ہربندہ دیکھے گا۔

افتخار گیلانی کا شمار آزاد کشمیر کی سیاست میں مسلم لیگ (ن) کے نمایاں رہنماؤں میں ہوتا ہے۔ ان کا تعلق مظفرآباد کے ایک معروف سیاسی خاندان سے ہے اور وہ قانون، تعلیم اور پارلیمانی سیاست کے شعبوں میں طویل تجربہ رکھتے ہیں۔

بیرسٹر سید افتخار علی گیلانی نے ابتدائی تعلیم اسلام آباد میں حاصل کی، جس کے بعد اعلیٰ تعلیم کے لیے برطانیہ چلے گئے۔ وہاں انہوں نے بار ایٹ لا کی ڈگری حاصل کی اور وطن واپسی کے بعد اسلام آباد میں وکالت شروع کی۔

وہ قریباً ایک دہائی تک وکالت کے شعبے سے وابستہ رہے۔ عدالتی معاملات اور قانون کے شعبے میں کام کرنے کے دوران انہوں نے آئینی اور قانونی امور میں بھی تجربہ حاصل کیا۔