پمز آتشزدگی واقعے کی تحقیقات کے لیے اعلیٰ سطح انکوائری کمیٹی قائم

اسلام آباد (صداۓ سچ نیوز) پمز آتشزدگی واقعے کی تحقیقات کے لیے اعلیٰ سطح انکوائری کمیٹی کے قیام کا نوٹیفیکیشن جاری کردیا گیا۔

اعلامیے کے مطابق ریٹائرڈ وفاقی سیکرٹری داخلہ شاہد خان انکوائری کمیٹی کے چیئرمین ہوں گے، ڈاکٹر خورشید اُترا، ڈاکٹر بیرسٹر نبیل احمد اعوان اور ڈپٹی کمشنر اسلام آباد کمیٹی کے ارکان ہوں گے۔

کمیٹی پمز میں فائر سیفٹی انفرااسٹرکچر اور حفاظتی ضوابط پر عملدرآمد کا تفصیلی جائزہ لے گی، واقعے میں ملوث کسی بھی فرد کی غفلت کا تعین کرکے ذمہ داروں کا تعین کیا جائے گا۔

کمیٹی مستقبل میں ایسے واقعات کی روک تھام کے لیے ضروری اصلاحات کی سفارشات پیش کرے گی، انکوائری کمیٹی 48 گھنٹوں کے اندرسفارشات پر مشتمل عبوری رپورٹ وزیراعظم کو پیش کرے گی۔

کمیٹی مکمل تحقیقات اور قابل عمل سفارشات پر مشتمل جامع رپورٹ 5 روز کے اندر وزیراعظم کو پیش کرے گی، وزارت قومی صحت کو فوری طور پر انکوائری کمیٹی کو نوٹیفائی کرنے اور معاونت فراہم کرنے کی ہدایت کردی گئی ہے۔