پارکنگ تنازعہ، عدالتی خاتون افسر کی درخواست پر محکمہ تعلیم کا گریڈ 19کا افسر گرفتار

اسلام آباد (صدائے سچ کرائم سیل) پارکنگ کے تنازعے پر خاتون افسرسے بدتمیزی کرنے اور گاڑی توڑنے کے الزام میں محکمہ تعلیم کا گریڈ19 کا افسر احمد حسین سومروکے خلاف مقدمہ درج، تھانہ کوہسار پولیس نے گرفتار کر لیا۔

تفصیلات کے مطابق تھانہ کوہسار کو سعد عزیز نامی نوجوان کی درخواست موصول ہوئی کہ انکی پھوپھی سرکاری افسر ہیں اور وفاقی دارالحکومت کے سیکٹر ایف سکس فور گلی نمبر 50میں رہائش پذیر ہیں۔

احمد حسین سومرو نے انکی پھوپھو کی گاڑی کیلئے مخصوص پارکنگ کی جگہ پر اپنی گاڑی کھڑی کر دی اور بعد ازاں گاڑی ہٹانے کے معاملے پر میری پھوپھی جو کہ عمومی اسلامی برقعہ کر کے گاڑی کے پاس پہنچیں تو احمد حسین سومرو نے انتہائی بازاری طریقے سے اور ان کے خاتون ہونے کا لحاظ کئے بغیر گالیاں دینا شروع کر دیں۔

‘ شور پر میں وہاں پہنچا تو ملزم نے گاڑی سے آہنی سلاخ نکال کر مجھ پر جان سے مارنے کیلئے حملہ کیا اور گاڑی کا سامنے والا شیشہ توڑ دیا۔ اس پر ہمسائے بھی موقع پر آئے مگر احمد حسین سومرو گالیاں اور دھمکیاں دیتے ہوئے موقع سے فرار ہو گیا اس لئے اس کیخلاف سخت قانونی کاروائی کی جائے۔

ذرائع کے مطابق مذکورہ متاثرہ خاتون اسلام آباد ہائی کورٹ کی اسسٹنٹ رجسٹرار ہیں جبکہ ملزم احمد حسین سومرو سیکشن افسر اور ڈپٹی سیکرٹری کے طور پر وفاقی حکومت میں خدمات سرانجام دے رہا ہے ۔ وہ آج کل وفاقی محکمہ تعلیم میں ایسوسی ایٹ پروفیسر کے طور پر کام کر رہا ہے جسے اسلام آباد پولیس نے گرفتار کر کے تفتیش شروع کر دی ہے ۔