سیکرٹری اطلاعات کی پوسٹ کیلئے پانچ افسران کا انٹرویو، طارق خان بھی شامل

اسلام آباد (خصوصی رپورٹ: سید تبسم عباس شاہ) وزیر اعظم پاکستان نے سیکرٹری اطلاعات و نشریات کی خالی پوسٹ کیلئے انفارمیشن گروپ کے گریڈ اکیس کے پانچ افسران کا انٹرویو کر لیا ہے۔

تفصیلات کے مطابق قبل ازیں انفارمیشن گروپ گریڈ 21 کی سینیارٹی لسٹ میں سرفہرست طارق خان کا نام سیکرٹری اطلاعات و نشریات کیلئے زیر غور افسران کی لسٹ سے غائب کر دیا تھا لیکن اب انہیں بھی انٹرویو کی فہرست میں شامل کر لیا گیا۔

جمعرات کے روز وزیراعظم پاکستان نے انفارمیشن گروپ کے گریڈ اکیس کے افسران ارشد منیر، اشفاق خلیل، عمرانہ وزیر، سعید شیخ اور طارق خان کا انٹرویو کیا گیا۔

انٹرویو کے دوران وفاقی وزیر اطلاعات و نشریات عطاء اللہ تارڑ، وزیر اعظم کے معاون خصوصی ڈاکٹر توقیر شاہ اور احد چیمہ نے وزیراعظم کی معاونت کی۔

تاہم، صدائے سچ کے ذرائع نے دوبارہ یہ دعویٰ کیا ہے کہ سیکرٹری اطلاعات و نشریات کی سیٹ کیلئے ارشد منیر اور اشفاق احمد خلیل کو ہی فیورٹ قرار دیا جا رہا ہے۔

وزیر اعظم کو مذکورہ افسران کے سروس ریکارڈ، انتظامی رویے، رحجانات اور ان کی شہرت کے حوالے سے ریکارڈ فراہم کر دیا گیا ہے۔

یاد رہے کہ طارق محمود خان تقریباً ڈیڑھ سے او ایس ڈی ہیں جبکہ ارشد منیر ایڈیشنل سیکرٹری وزیر اعظم سیکرٹریٹ کے طور پر خدمات سرانجام دے رہے ہیں۔

وہ دو سال سے زائد عرصہ گریڈ 21 میں گزار چکے ہیں، اس لیے گریڈ 22 میں ترقی کے بھی اہل ہو چکے ہیں۔

عمرانہ وزیر اس وقت ایگزیکٹو ڈائریکٹرجنرل انفارمیشن سروس اکیڈمی ہیں ۔

سعید احمد شیخ ڈائریکٹرجنرل ریڈیو پاکستان ہیں جبکہ اشفاق احمد خلیل ایڈیشنل سیکرٹری وزارتِ اطلاعات و نشریات کے طور پر کام کر رہے ہیں۔

اس انٹرویو کی دلچسپ بات یہ کہ وزیر اعظم نے تین افسران کا اجتماعی انٹرویو کیا ہے۔ وزیر اعظم میاں شہباز شریف، وفاقی وزیر اطلاعات و نشریات عطاء اللہ تارڑ، وزیر اعظم کے معاون خصوصی ڈاکٹر توقیر شاہ اور احد چیمہ کی مشاورت سے وزارتِ اطلاعات کے سیکرٹری کا فیصلہ کریں گے۔