متحدہ عرب امارات کا سعودی تیل خریدنے کا منصوبہ، حملہ زدہ سپر ٹینکر سے 18 لاکھ 70 ہزار بیرل خام تیل فروخت کرنے کی پیشکش

ابوظہبی (صداۓ سچ نیوز) عالمی خبر رساں ادارے رائٹرز کے مطابق متحدہ عرب امارات نے سعودی عرب کا خام تیل فروخت کرنے کی پیشکش کی ہے، جو ایک ایسے سپر ٹینکر میں موجود تھا جسے گزشتہ ماہ نامعلوم پروجیکٹائل سے نشانہ بنایا گیا تھا اور اس کے نتیجے میں جہاز سے تیل کا اخراج شروع ہوگیا تھا۔ رائٹرز نے تین تجارتی ذرائع اور ایک ٹینڈر دستاویز کے حوالے سے اس غیر معمولی تجارتی پیش رفت کی تفصیلات جاری کی ہیں۔

رائٹرز کی رپورٹ کے مطابق سعودی خام تیل سپر ٹینکر جیم نمبر 2 میں موجود تھا، جسے گزشتہ ماہ حملے کا نشانہ بنایا گیا تھا۔ متحدہ عرب امارات کے حکام نے اکتوبر کے آخری ہفتے میں جہاز سے تیل کا اخراج روکنے میں کامیابی حاصل کی تھی، تاہم متاثرہ ساحلی علاقوں میں صفائی اور ماحولیاتی آلودگی کے خاتمے کے لیے آپریشن جاری رکھا گیا۔

رائٹرز کے مطابق متحدہ عرب امارات کی وزارت توانائی نے سعودی عرب کے معروف خام تیل عرب لائٹ کی فروخت کے لیے ٹینڈر جاری کیا، جس کے تحت 10 سے 20 نومبر کے دوران ایک جہاز سے دوسرے جہاز میں تیل منتقل کرکے لوڈنگ کی پیشکش کی گئی تھی۔ ٹینڈر کی آخری تاریخ پیر 9 نومبر تھی۔

رپورٹ میں بتایا گیا ہے کہ ابتدائی طور پر 17 لاکھ بیرل سعودی خام تیل فروخت کے لیے پیش کیا گیا تھا، تاہم بعد ازاں اس مقدار میں اضافہ کرتے ہوئے اسے 18 لاکھ 70 ہزار بیرل کردیا گیا۔

ایک تجارتی ذریعے نے رائٹرز کو بتایا کہ سعودی تیل کے اس کارگو کی فروخت کے لیے طے کردہ شرائط متحدہ عرب امارات کی سرکاری آئل کمپنی ابوظہبی نیشنل آئل کمپنی کی جانب سے پیش کردہ شرائط سے ملتی جلتی تھیں۔

واضح رہے کہ سعودی عرب اور متحدہ عرب امارات آبنائے ہرمز کے اطراف ایران سے منسوب بحری خطرات اور تجارتی جہازوں پر حملوں کے باوجود اپنی خام تیل کی برآمدات برقرار رکھنے کی کوشش کر رہے ہیں۔ خطے میں بڑھتی ہوئی کشیدگی نے عالمی توانائی کی ترسیل اور تیل کی سپلائی کے حوالے سے خدشات میں اضافہ کردیا ہے۔

آبنائے ہرمز عالمی سطح پر خام تیل کی ترسیل کے لیے انتہائی اہم سمندری گزرگاہ ہے۔ اس راستے پر سکیورٹی خطرات کے باعث خلیجی ممالک کو تیل کی نقل و حمل اور برآمدات کے لیے متبادل انتظامات اور تجارتی طریقہ کار اختیار کرنا پڑ رہے ہیں۔

رائٹرز کی رپورٹ کے مطابق سعودی خام تیل کی فروخت کے لیے متحدہ عرب امارات کی یہ پیشکش خطے کی غیر معمولی تجارتی صورتحال اور بحری نقل و حمل کو درپیش مشکلات کے تناظر میں سامنے آئی ہے۔