برمنگھم میں ’’وارثِ آیتِ تطہیر کا ماتم‘‘ کے عنوان سے عظیم الشان اجتماعِ عزاء، علما، ذاکرین اور معروف نوحہ خواں حضرات کی بھرپور شرکت

برمنگھم (صدائے سچ نیوز ) برطانیہ کے شہر برمنگھم میں سیدۂ کائنات حضرت فاطمہ زہرا سلام اللہ علیہا کی یاد میں ’’وارثِ آیتِ تطہیر کا ماتم‘‘ کے عنوان سے ایک عظیم الشان اجتماعِ عزاء منعقد ہوا، جس میں برطانیہ کے مختلف شہروں اور دیگر مقامات سے علمائے کرام، ذاکرین، معروف نوحہ خواں حضرات، ماتمی دستوں اور عزادارانِ اہلِ بیتؑ نے بڑی تعداد میں شرکت کی۔

حسینیہ ریجنٹ پارک ہال برمنگھم میں منعقد ہونے والے اس روح پرور اجتماع میں مقررین نے حضرت فاطمہ زہرا سلام اللہ علیہا کی سیرتِ طیبہ، مقام و مرتبہ، فضائل و مناقب اور قربانیوں کو خراجِ عقیدت پیش کرتے ہوئے اہلِ بیت اطہارؑ کی تعلیمات، پیغامِ کربلا اور اسلامی اقدار کی ترویج کی اہمیت پر تفصیلی روشنی ڈالی۔

اجتماع سے خطاب کرنے والے علمائے کرام میں مولانا محمد رضا داؤدانی، مولانا سید بلال کاظمی، علامہ سید علی کاظمی اور علامہ اسد رضا زیدی شامل تھے۔ اس موقع پر معروف ذاکرین وسیم عباس بلوچ، ثقلین عباس گھلو، آصف کمال حیدر، علی عمران جعفری، زین علی زیدی اور قمر کیانی نے بھی اپنے خطابات کے ذریعے حاضرین کو واقعۂ کربلا اور سیرتِ اہلِ بیتؑ کے مختلف پہلوؤں سے آگاہ کیا۔

اجتماع کا ایک اہم حصہ معروف نوحہ خواں حضرات کی پرسوز نوحہ خوانی پر مشتمل تھا۔ پاکستان سے تعلق رکھنے والے کاظمی برادرز سمیت میر حسن میر، میر قاسم میر، میر جواد میر، قیس عباس قومی (یوکے)، شبی الحسن کاظمی اور ذاکر چوہدری اعجاز (یوکے) نے اپنے مخصوص انداز میں نوحے اور مرثیے پیش کیے۔ ان کی پرسوز آوازوں نے محفلِ عزاء کی فضا کو سوگوار اور حاضرین کے قلوب کو یادِ اہلِ بیتؑ سے منور کیے رکھا۔

اس موقع پر زوار مرکزی ماتمی دستہ (یوکے) کی شرکت بھی نمایاں رہی۔ منتظرِ عزاداران تقی عباس بخاری سمیت دیگر شخصیات اور عزاداران نے بھی اجتماع میں شرکت کرکے اپنی عقیدت و محبت کا اظہار کیا۔ پروگرام کی اہمیت کے پیش نظر پاکستان اور برطانیہ میں مختلف عزاداری نیٹ ورکس کے ذریعے اس کی براہِ راست نشریات بھی پیش کی گئیں، جس سے برطانیہ کے علاوہ دیگر مقامات پر موجود عقیدت مند بھی اس اجتماع میں شریک ہو سکے۔

منتظمین کے مطابق اس اجتماع کے انعقاد کا بنیادی مقصد حضرت فاطمہ زہرا سلام اللہ علیہا کی حیاتِ مبارکہ، ان کی عظیم قربانیوں اور اہلِ بیت اطہارؑ کی تعلیمات کو اجاگر کرنے کے ساتھ ساتھ نئی نسل کو ان کے کردار، صبر، استقامت اور حق و صداقت کے پیغام سے روشناس کرانا تھا۔

اجتماع کے اختتام پر شرکاء نے اس عزم کا اظہار کیا کہ اہلِ بیت اطہارؑ سے وابستگی، ان کی تعلیمات کی ترویج اور ذکرِ مصائب و فضائل کا یہ سلسلہ پوری عقیدت و احترام کے ساتھ جاری رکھا جائے گا۔