پاکستان پریس کلب برطانیہ کے انتخابات مکمل، نو منتخب عہدیداروں نے حلف اٹھا لیا

لندن (صداۓ سچ نیوز) پاکستان پریس کلب برطانیہ کے سالانہ انتخابات مکمل ہونے کے بعد نو منتخب کابینہ نے اپنے عہدوں کا حلف اٹھا لیا۔ انتخابات میں ارشد چیال صدر جبکہ مسرت اقبال راجہ بلا مقابلہ جنرل سیکرٹری منتخب ہوئے۔

تفصیلات کے مطابق انتخابات خوشگوار، پرامن اور جمہوری ماحول میں منعقد ہوئے۔ صدر کے عہدے کے لیے ارشد چیال اور ریاض بٹ کے درمیان مقابلہ ہوا، جس میں ارشد چیال کامیاب قرار پائے۔

جنرل سیکرٹری کے عہدے پر مسرت اقبال راجہ بلا مقابلہ منتخب ہوئے، جبکہ سینئر نائب صدر کے عہدے پر شیراز خان بلا مقابلہ منتخب ہوئے۔ نائب صدر کی نشستوں پر عمران راجہ اور سردار عرفان طاہر کو کامیابی ملی ،فنانس سیکرٹری کے عہدے پر عتیق الرحمن چوہدری بھی بلا مقابلہ منتخب ہوئے، جبکہ ایگزیکٹو ممبران کی دس نشستوں میں سے سات امیدوار منتخب ہوئے۔

انتخابات کے بعد منعقدہ تقریبِ حلف برداری میں چیف الیکشن کمشنر ناہید رندھاوا نے نو منتخب عہدیداران سے ان کے عہدوں کا حلف لیا۔ اس موقع پر الیکشن کمیشن کے اراکین کو شفاف، منصفانہ اور کامیاب انتخابات کے انعقاد پر خراجِ تحسین پیش کیا گیا۔

نو منتخب صدر ارشد چیال نے اپنے خطاب میں کہا کہ مرحوم مبین چوہدری نے پاکستان پریس کلب برطانیہ کی جو بنیاد رکھی تھی، وہ آج ایک تناور درخت بن چکی ہے۔

انہوں نے کہا کہ ان کی کامیابی ادارے میں آئینی اور جمہوری روایات کے تسلسل کی علامت ہے۔ وہ تمام برانچز کو ساتھ لے کر چلیں گے اور پاکستان پریس کلب برطانیہ کو مزید فعال، مضبوط اور متحد بنانے کے لیے بھرپور کردار ادا کریں گے۔انہوں نے تمام اراکین کا شکریہ ادا کرتے ہوئے کہا کہ وہ ان کے اعتماد پر پورا اترنے کی ہر ممکن کوشش کریں گے