او پی ایف ممبران کوبیسٹ ویسٹرن ہوٹل پر خصوصی رعایت ملے گی، معاہدہ طے

اسلام آباد (صدائے سچ نیوز)اوپی ایف اور بیسٹ ویسٹرن ہوٹل کے درمیان معاہدہ طے پاگیا، ممبران خاطر خواہ رعایتیں حاصل کرینگے، مفاہمت کی یادداشت پر دستخط کردیئے گئے۔

اوورسیز پاکستانیز فاونڈیشن (اوپی ایف) نے اپنے فلیگ شپ اقدام، "بیرون ملک پاکستانیوں اور ان کے خاندانوں کے لیے ڈسکاونٹ پروگرام” کے تحت بیسٹ ویسٹرن پریمیئر ہوٹل، اسلام آباد کے ساتھ شراکت داری کی ہے۔ اس تعاون کے تحت، اوپی ایف ممبران بیسٹ ویسٹرن پریمیئر کی طرف سے پیش کردہ مہمان نوازی کی خدمات پر خاطر خواہ رعایتیں حاصل کریں گے۔

متفقہ رعایتوں میں رہائش پر 40فیصد، فوڈ آوٹ لیٹس پر 20فیصد، سیلون اور لانڈری کی خدمات پر 15فیصد، اور ضیافت کی سہولیات پر 10فیصد شامل ہیں۔ مزید برآں، اوپی ایف ممبران کو بیسٹ ویسٹرن پریمیئر ریوارڈ پروگرام میں بھی شامل کیا جائے گا، جو دنیا بھر میں500 4سے زیادہ ہوٹلوں میں قابل ادائیگی ہے۔

یہ بھی پڑھیں: اوپی ایف اور یونائیٹڈ انشورنس کمپنی پاکستان کا تاریخی معاہدہ مفاہمت کی یادداشت پر دستخط

یہ رعایتیں اور فوائداو پی ایف ملازمین تک بھی پہنچیں گے۔ مفاہمت کی یادداشت (ایم او یو) پر او پی ایف کی جانب سے ڈائریکٹر جنرل ویلفیئر اینڈ سروسز / ایچ آر اینڈ اے مصطفی حیدر اور جنرل مینجربیسٹ ویسٹرن راشد روف بانڈے نے دستخط کیے۔دستخط کی تقریب کی صدارت چیئرمین بورڈ آف گورنرز او پی ایف سید قمر رضا اور منیجنگ ڈائریکٹر او پی ایف جناب افضال بھٹی نے کی۔

اس موقع پر خطاب کرتے ہوئے، چیئرمین او پی ایف، سید قمر رضا نے اس بات پر زور دیا کہ سمندر پار پاکستانیوں کی فلاح و بہبود اور انہیں سہولت فراہم کرنا مشترکہ قومی ذمہ داری ہے، اور سرکاری اور نجی شعبوں کے درمیان اس طرح کے تعاون سمندر پار کمیونٹی کو پہچاننے اور ان کی خدمت کے لیے اجتماعی عزم کی علامت ہے۔

منیجنگ ڈائریکٹر او پی ایف، محمد افضال بھٹی نے بیسٹ ویسٹرن پریمیئر کے تعاون کو سراہتے ہوئے کہا کہ یہ شراکت داری عملی، قدر پر مبنی اقدامات کے ذریعے سمندر پار پاکستانیوں اور ان کے خاندانوں کے لیے اپنے سہولت کاری کے نیٹ ورک کو بڑھانے کے لیے او پی ایف کی مسلسل کوششوں کی عکاسی کرتی ہے۔

یہ شراکت داری تعاون کے ایک ماڈل کی نمائندگی کرتی ہے جس کا مقصد او پی ایف کے فلاح و بہبود، شناخت اور خدمت کی عمدہ کارکردگی کے مشن کو مضبوط بناتے ہوئے سمندر پار کمیونٹی کو ٹھوس فوائد فراہم کرنا ہے۔