راولپنڈی میں قیدی وین سے فرار ہونے والے 3 خطرناک ملزمان گرفتار

راولپنڈی (صداۓ سچ نیوز) راولپنڈی میں پولیس کی تحویل سے فرار ہونے والے حوالاتیوں میں سے تین خطرناک ملزمان کو دوبارہ گرفتار کر لیا گیا۔ سی پی او نے دیگر مفرور ملزمان کی جلد گرفتاری کیلئے بھی تمام ممکنہ وسائل استعمال کرنے کی ہدایت کر دی۔ کہتے ہیں  تحقیقاتی رپورٹ آنے پر ذمہ داران کے خلاف کارروائی بھی ہو گی۔

پولیس ترجمان کے مطابق ملزمان کو کہوٹہ کے قریبی علاقہ سے ٹارگٹڈ سرچ آپریشن کے دوران گرفتار کیا گیا۔  گرفتار ہونے والے ملزمان میں ضیغم شاہ،عدیل شاہ اور احتشام شامل ہیں۔ 

دوسری طرف سی پی او راولپنڈی خالد ہمدانی کی زیرصدارت تھانہ کہوٹہ میں اعلٰی سطح کا اجلاس ہوا۔ اجلاس میں فرار حوالاتیوں کی دوبارہ گرفتاری کے حوالے سے پیشرفت کا جائزہ لیا گیا۔ بتایا گیا کہ دس  مفرور ملزمان میں سے تین دوبارہ پکڑے گئے ہیں۔ سی پی او نے تینوں گرفتار ملزمان کو اسلام آباد پولیس کے حوالے کرنے کی ہدایت کر دی اور  کہا دیگر مفرور ملزمان کی جلد گرفتاری کیلئے بھی تمام ممکنہ وسائل استعمال کئے جائیں۔

تحقیقاتی کمیٹی حقائق پر مبنی رپورٹ جلد مرتب کرکے پیش کرے۔ ایسا نظام وضع کیا جائے کہ آئندہ اس طرح کے واقعات  رونما نہ ہوں ۔

سی پی او نے کہا کہ تحقیقاتی رپورٹ آنے پر ذمہ داران کے خلاف کارروائی بھی کی جائے گی۔ دو روز قبل کہوٹہ سے راولپنڈی آنے والی قیدی وین میں موجود چونتیس میں سے چودہ ملزمان فرار ہوگئے تھے۔ چار کو کچھ ہی دیر بعد گرفتار کر لیا گیا تھا۔