سات کروڑ افراد مزید غربت وافلاس کا شکار ہوگئے : چوہدری عبیداللہ

اسلام آباد ( صداۓ سچ نیوز )مسلم لیگ ن کے رہنماء چیئرمین انجمنِ تاجران مرکز جی سیون ستارہ مارکیٹ چوہدری محمد عبیداللہ نے غربت وافلاس کی دلدل میں موجود12 کروڑ افراد میں مزید 7 کروڑ لوگوں کے اضافہ کو انتہائی تشویش ناک قرار دے کر وفاقی وصوبائی حکومتوں سے بیروزگاری اور افراط زر کے خاتمے کے لیے انقلاب آفریں اقدامات اٹھانے کا مطالبہ کیا۔

ان کا کہنا تھا کہ پاورٹی ایسٹیمیشن کمیٹی کی رپورٹ میں انکشاف کیا گیا کہ غربت کی موجودہ شرح 28.9 فیصد پر پہنچ گئی جن میں 6 کروڑ 97 لاکھ افراد ایسے بھی شامل ہوگئے جن کی ماہانہ آمدنی 9 ہزار سے بھی کم ہے۔

چوہدری محمد عبیداللہ نے کہا کہ بیروزگاری کے پھیلاؤ کو روکنے کے لیے وفاقی حکومت سرمایہ کاری کے فروغ کے ساتھ نئی صنعتوں کو ٹیکسوں سے مہیب سائے سے دور رکھے۔

پرائیویٹ اور پبلک پارٹنر شپ بھی انسداد غربت کے لیے اکسیر کا درجہ رکھتی ہے ۔ مزید کہا کہ ایک کروڑ بیروزگار گریجویٹس اور ملازمت سے محروم 5 کروڑ نوجوان مسلسل مایوسی کا شکار ہیں، وزیراعظم میاں شہبازشریف اور انکی حکومتی ٹیم اس انسانی مسئلے کو نظر انداز نہ کرے۔