2025 میں 4000 پاکستانی ڈاکٹرز کی بیرونِ ملک ہجرت

اسلام آباد (صدائے سچ نیوز) 2025 کے دوران پاکستان سے تقریباً 4,000 طبی ماہرین بیرونِ ملک روزگار کے لیے روانہ ہو گئے، جو ایک سال میں ریکارڈ کی جانے والی سب سے بڑی تعداد ہے۔ یہ انکشاف بیورو آف امیگریشن کے ڈیٹا کے تجزیے سے سامنے آیا ہے، جس نے ملکی صحت کے نظام پر بڑھتے ہوئے دباؤ کے حوالے سے نئی تشویش کو جنم دیا ہے۔

اعداد و شمار کے مطابق ملک کی آبادی 24 کروڑ سے تجاوز کر چکی ہے، جبکہ صحت کی سہولیات پہلے ہی شدید قلت کا شکار ہیں۔ عالمی ادارہ صحت (WHO) کے معیارات کے مطابق ہر ایک ہزار افراد کے لیے کم از کم ایک ڈاکٹر ہونا چاہیے، تاہم پاکستان میں صورتحال اس معیار سے خاصی مختلف ہے۔ شہری علاقوں میں ایک ڈاکٹر اوسطاً 3,000 افراد کو طبی سہولیات فراہم کر رہا ہے، جبکہ دیہی علاقوں میں یہ بوجھ بڑھ کر 8,000 سے 15,000 افراد تک پہنچ جاتا ہے۔

یہ بھی پڑھیں: سوشل میڈیا کا زیادہ استعمال بچوں کی ذہنی صلاحیتوں کو متاثر کرتا ہے، تحقیق

ماہرین کے مطابق بیرونِ ملک جانے والے ڈاکٹرز زیادہ تر اعلیٰ تربیت یافتہ اور تجربہ کار ہیں، جن کی تعلیم و تربیت پر قومی وسائل اور خاندانوں کی برسوں کی محنت صرف ہوئی ہوتی ہے۔ ایک ڈاکٹر کی بیرونِ ملک منتقلی سینکڑوں مریضوں کی دیکھ بھال کو متاثر کرتی ہے، اور جب ہزاروں کی تعداد میں طبی ماہرین ملک چھوڑ دیں تو پورا صحت کا ڈھانچہ کمزور پڑ جاتا ہے۔

خصوصاً سرکاری ہسپتالوں، بنیادی صحت کے یونٹس اور دیہی مراکز صحت میں ڈاکٹروں کی شدید کمی کی اطلاعات ہیں، جس کے باعث عام شہریوں کو بروقت اور معیاری طبی سہولیات کی فراہمی مزید دشوار ہو گئی ہے۔