ڈی ایچ او پشاور پر بدعنوانی کے سنگین الزامات، معاملہ اسمبلی میں پہنچ گیا

پشاور(کامران گل) خیبرپختونخوا اسمبلی میں محکمۂ صحت سے متعلق ایک سنگین معاملہ زیرِ بحث آ گیا، جہاں ایک رکنِ اسمبلی نے ڈسٹرکٹ ہیلتھ آفیسر (ڈی ایچ او) پشاور کے خلاف توجہ دلاؤ نوٹس جمع کراتے ہوئے ان پر اختیارات کے ناجائز استعمال اور مبینہ مالی بدعنوانیوں کے الزامات عائد کیے۔

توجہ دلاؤ نوٹس میں مؤقف اختیار کیا گیا کہ ڈی ایچ او پشاور گزشتہ تقریباً پانچ سال سے اسی عہدے پر تعینات ہے اور اس دوران مبینہ طور پر پیسوں کے عوض پوسٹنگ اور ٹرانسفرز کا سلسلہ جاری رکھا ہوا ہے، جو کہ سرکاری قواعد و ضوابط کی صریح خلاف ورزی ہے۔

رکنِ اسمبلی کے مطابق جب مذکورہ افسر سے ان اقدامات کے بارے میں سوال کیا جاتا ہے تو وہ ہر بار یہ کہہ کر جان چھڑا لیتا ہے کہ اسے یہ سب کچھ “اوپر سے احکامات” کے تحت کرنا پڑ رہا ہے۔ اس مبہم وضاحت نے محکمۂ صحت میں شفافیت پر مزید سوالات کھڑے کر دیے ہیں ۔

معزز رکن نے ایوان کی وساطت سے وزیرِ صحت سے مطالبہ کیا کہ ڈی ایچ او پشاور کو فوری طور پر معطل کیا جائے اور اس معاملے کی شفاف، غیر جانبدار اور جامع انکوائری کرائی جائے، تاکہ اصل حقائق سامنے آ سکیں اور ذمہ داروں کے خلاف قانونی کارروائی عمل میں لائی جا سکے۔

ذرائع کے مطابق اس معاملے پر ایوان میں شدید تشویش کا اظہار کیا گیا جبکہ توقع ظاہر کی جا رہی ہے کہ حکومت اس حساس مسئلے پر جلد فیصلہ کرے گی، کیونکہ اس کا براہِ راست تعلق عوامی صحت اور محکمۂ صحت کی ساکھ سے ہے۔