ن لیگ اور پیپلز پارٹی کے درمیان قانون سازی میں تعاون پر ڈیڈ لاک ختم

اسلام آباد (صداۓ سچ نیوز) مسلم لیگ ن اور اتحادی جماعت پیپلزپارٹی کے درمیان قانون سازی میں تعاون پر جاری ڈیڈ لاک ختم  ہوگیا۔ پیپلزپارٹی دونوں ایوانوں میں حکومت کی حمایت کرے گی جبکہ بدلے میں پیپلزپارٹی کو انتخابی اصلاحات کیلئے بنائی  جارہی پارلیمانی کمیٹی کی چیئرمین شپ دی جائے گی۔

ذرائع کے مطابق مسلم لیگ نون اور پیپلز پارٹی کے درمیان پارلیمانی کمیٹی برائے انتخابی اصلاحات کے قیام پر بھی اتفاق ہو گیا۔  انتخابی اصلاحات کمیٹی کی چیئرمین شپ پیپلز پارٹی کو دی جائے گی۔ کمیٹی میں پارلیمان میں شامل تمام جماعتوں کو نمائندگی دینے پر اتفاق ہوا ہے۔

ذرائع کے مطابق  تمام جماعتوں کو دونوں ایوانوں میں تعداد کی بنیاد پر نمائندگی  ملے گی، مسلم لیگ نون اور پیپلز پارٹی نے آئی ایم ایف کی شرائط پر مبنی بلز سمیت تیس مختلف بلز کی منظوری پر بھی اتفاق کیا ہے۔ پیپلزپارٹی قومی اسمبلی اور سینیٹ میں قانون سازی میں حکومت کی حمایت کرے گی۔