سرگودھا میں پولٹری شیڈز کے 16 اور بھٹہ خشت کے ایک کیس کی ماحولیاتی منظوری دے دی گئی

سرگودھا (صداۓ سچ نیوز) کمشنر سرگودھا ڈویژن حافظ شوکت علی کی زیرِ صدارت ڈویژنل انوائرنمنٹل اپروول کمیٹی کے اجلاس میں پولٹری شیڈز کے 16 اور بھٹہ خشت کے ایک کیس سمیت مجموعی طور پر 17 منصوبوں کی ماحولیاتی منظوری دے دی گئی۔

اجلاس میں پولٹری شیڈز کی تعمیر کے 20 کیسز اور بھٹہ خشت کے ایک کیس کو ماحولیاتی منظوری اور این او سی کے اجراء کے لیے پیش کیا گیا، جن میں سے کمیٹی نے متعلقہ ماحولیاتی قواعد و ضوابط کا جائزہ لینے کے بعد 17 کیسز کی منظوری دی۔

اس موقع پر کمشنر حافظ شوکت علی نے ہدایت کی کہ ماحولیاتی منظوریوں کے عمل میں شفافیت، میرٹ اور مقررہ قواعد و ضوابط پر مکمل عمل درآمد یقینی بنایا جائے۔ انہوں نے کہا کہ پولٹری فارمنگ اور دیگر کاروباری سرگرمیوں کے فروغ کے لیے قانونی تقاضوں کے مطابق سہولیات فراہم کرنا ضروری ہے، تاہم معاشی سرگرمیوں کے ساتھ ماحولیاتی تحفظ، صفائی ستھرائی اور صحتِ عامہ کے اصولوں کو بھی ہر صورت ملحوظ رکھا جائے۔

کمشنر نے متعلقہ افسران کو ہدایت کی کہ ماحولیاتی منظوری کے لیے پیش کیے جانے والے کیسز کا بروقت اور شفاف جائزہ لیا جائے اور مقررہ طریقہ کار کے مطابق کارروائی مکمل کی جائے۔ انہوں نے ماحول کو آلودگی سے محفوظ رکھنے کے لیے مؤثر اقدامات یقینی بنانے پر بھی زور دیا۔

اجلاس میں ایڈیشنل کمشنر کوآرڈینیشن، ڈپٹی ڈائریکٹر انوائرنمنٹل پروٹیکشن ایجنسی (EPA) اور اسسٹنٹ ڈائریکٹرز ای پی اے نے شرکت کی۔