وادی سوات اور نیلم میں شدید برفباری، پہاڑی علاقوں میں سردی کی شدت میں اضافہ

سوات (صداۓ سچ نیوز) وادی سوات کے بالائی مقامات کالام، مالم جبہ، مٹلتان، پلوگاہ، مہوڈنڈ اور اتروڑ میں برف باری کے بعد موسم میں نمایاں سردی دیکھی گئی ہے۔

محکمہ موسمیات کے مطابق کالام میں اب تک چار انچ، جبکہ مہوڈنڈ اورپلوگاہ میں ایک فٹ تک برف باری ریکارڈ کی گئی ہے اور برف باری کا سلسلہ جاری ہے۔

وادی نیلم کے زیریں علاقوں میں بارش، جبکہ بالائی علاقوں میں برفباری کا آغاز ہو گیا ہے، شاردہ کیل، جاگراں ویلی، گریس اور تاؤبٹ میں برفباری جاری ہے، جس سے سردی کی شدت میں اضافہ ہوا اورمعمولاتِ زندگی متاثر ہوئے ہیں۔

انتظامیہ نے شہریوں کو غیر ضروری سفر سے گریز کی ہدایت کی ہے تاکہ کسی بھی حادثے سے بچا جا سکے، شہری علاقوں میں ہلکی بارش کا سلسلہ بھی برقرار ہے، جس سے مجموعی طور پر سردی میں اضافہ ہوا۔

محکمہ موسمیات کے مطابق آئندہ 24 گھنٹوں کے دوران ملک کے بیشترعلاقوں میں موسم سرد اور خشک رہنے کا امکان ہے، جبکہ پہاڑی علاقوں میں صبح اور رات کے اوقات میں شدید سردی متوقع ہے۔

گلگت بلتستان، کشمیر، بالائی خیبرپختونخوا اور شمالی بلوچستان میں مطلع جزوی ابر آلود رہنے کے ساتھ ساتھ چند مقامات پر ہلکی بارش اور برف باری کی بھی توقع ہے۔

گزشتہ 24 گھنٹوں کے دوران ملک کے زیادہ تر علاقوں میں موسم سرد اور خشک رہا، اور بالائی پہاڑی علاقوں میں درجہ حرارت میں مزید کمی دیکھی گئی۔

جمعہ کو ریکارڈ کیے گئے کم سے کم درجہ حرارت کے مطابق لہہ میں منفی 11، استور منفی 7، کالام اور سکردو منفی 5، جبکہ مالم جبہ اور گوپس میں منفی 4 ڈگری سینٹی گریڈ ریکارڈ کیا گیا۔

محکمہ موسمیات نے شہریوں اور مسافروں کو سردی کے اثرات سے بچاؤ کے لیے مناسب لباس پہننے اور پہاڑی علاقوں میں احتیاطی اقدامات اختیار کرنے کی ہدایت کی ہے۔