اوورسیزکشمیری ملکی معیشت کی ریڑھ کی ہڈی ہیں، مسائل کے حل کے لیے سنجیدہ کوششیں کی جائیں گی، چوہدری ریاض

لوٹن( نامہ نگار) سابق سینئر مشیرِ حکومت ومرکزی رہنما پاکستان پیپلز پارٹی چوہدری ریاض سے اوورسیز کشمیریز کنونشن کے وفد نے ملاقات کی،جس میں بیرونِ ملک مقیم پاکستانیوں اور کشمیری کمیونٹی کو درپیش مسائل، حکومتی اقدامات اور باہمی تعاون کے فروغ پر تفصیلی تبادلہ خیال کیا گیا۔

وفد کی قیادت نائب صدر پی پی پی یوکے ریاض کوہمروی کر رہے تھے جبکہ دیگر نمایاں اراکین میں کنوینئر کشمیر رابطہ کمیٹی اوورسیز پاکستانیز ویلفیئر کونسل چوہدری محمد نثار،صدر بزنس فورم لندن اوورسیز پاکستانیز ویلفیئر کونسل و نائب صدر پی وائی او یوکے رفاقت علی چوہدری شامل تھے۔

ملاقات میں اوورسیز پاکستانیوں وکشمیریوں کو درپیش قانونی، انتظامی اور سرمایہ کاری سے متعلق امور پر تفصیلی گفتگو کی گئی۔وفد کے اراکین نے چوہدری ریاض کو بیرونِ ملک مقیم پاکستانیوں اور کشمیریوں کو درپیش مسائل سے آگاہ کرتے ہوئے کہا کہ اوورسیز پاکستانیز وکشمیریز ملک کی معیشت میں ریڑھ کی ہڈی کی حیثیت رکھتے ہیں۔

انہوں نے اس امر پر زور دیا کہ سمندر پار پاکستانی ترسیلاتِ زر کے ذریعے ملکی معیشت کو مستحکم بنانے میں کلیدی کردار ادا کر رہے ہیں اس لیے ان کے مسائل کا ترجیحی بنیادوں پر حل ناگزیر ہے۔وفد نے جائیداد کے تنازعات،عدالتی معاملات میں تاخیر،سرکاری اداروں سے رابطے میں مشکلات اور سرمایہ کاری کے تحفظ جیسے امور پر خصوصی توجہ دلائی۔ملاقات کے دوران حکومتِ پاکستان اور حکومتِ آزاد جموں و کشمیر کی جانب سے اوورسیز پاکستانیوں وکشمیریوں کے لئے کئے گئے اقدامات کو سراہا گیا۔

اس موقع پر گفتگو کرتے ہوئے چوہدری ریاض نے کہا کہ اوورسیز پاکستانی اور کشمیری نہ صرف پاکستان کا قیمتی سرمایہ ہیں بلکہ وہ عالمی سطح پر ملک کے سفیر کا کردار بھی ادا کر رہے ہیں پاکستان پیپلز پارٹی نے ہمیشہ سمندر پار پاکستانیوں وکشمیریوں کے حقوق کے تحفظ اور ان کی فلاح و بہبود کے لیے عملی اقدامات کیے ہیں اور آئندہ بھی اس سلسلے کو مزید مؤثر بنایا جائے گا۔

انہوں نے یقین دہانی کرائی کہ اوورسیز کمیونٹی کو درپیش مسائل متعلقہ حکام تک پہنچائے جائیں گے اور ان کے حل کے لیے سنجیدہ کوششیں کی جائیں گی۔انہوں نے مزید کہا کہ پاکستان اور آزادکشمیر کی ترقی میں اوورسیز پاکستانیوں وکشمیریوں کا کردار ناقابلِ فراموش ہے بیرونِ ملک مقیم کشمیری مسئلہ کشمیر کو عالمی سطح پر اجاگر کرنے میں بھی اہم کردار ادا کر رہے ہیں، جس پر پوری قوم انہیں خراجِ تحسین پیش کرتی ہے۔

وفد کے اراکین نے چوہدری ریاض کا شکریہ ادا کرتے ہوئے امید ظاہر کی کہ ان کی قیادت میں اوورسیز پاکستانیوں وکشمیریوں کے مسائل کے حل کے لیے مؤثر آواز بلند کی جاتی رہے گی اور حکومت اور اوورسیز کمیونٹی کے درمیان روابط مزید مضبوط ہوں گے۔ملاقات کے اختتام پر باہمی تعاون کے فروغ اور مستقبل میں رابطوں کو مؤثر بنانے پر اتفاق کیا گیا،جبکہ اوورسیز کشمیریز کنونشن کے انعقاد اور اس کے مقاصد کو کامیاب بنانے کے عزم کا اعادہ بھی کیا گیا۔