آئی سی سی سالانہ جنرل اجلاس، ون ڈے کرکٹ کو 40 اوورز تک محدود کرنے سمیت اہم تجاویز زیر غور

انٹرنیشنل کرکٹ کونسل (آئی سی سی) کے سالانہ جنرل اجلاس میں عالمی کرکٹ کے مستقبل سے متعلق متعدد اہم تجاویز پر غور کیے جانے کا امکان ہے۔

برطانوی میڈیا رپورٹس کے مطابق اجلاس میں ون ڈے کرکٹ کے فارمیٹ میں تبدیلی پر بھی بحث متوقع ہے، جس کے تحت 50 اوورز کے بجائے ون ڈے میچز کو 40 اوورز تک محدود کرنے کی تجویز زیر غور آ سکتی ہے۔

رپورٹس کے مطابق مختلف براعظموں کی ٹیموں کے درمیان کانٹینینٹل چیمپئن شپ کے انعقاد کی تجویز بھی اجلاس کے ایجنڈے کا حصہ ہو سکتی ہے، جبکہ آئی سی سی ورلڈ کلب چیمپئن شپ کے انعقاد پر بھی غور کرے گی۔

اس کے علاوہ ہر فارمیٹ کے لیے الگ ونڈو مختص کرنے کی تجویز بھی زیر غور آنے کا امکان ہے تاکہ بین الاقوامی کرکٹ کے شیڈول کو مزید مؤثر بنایا جا سکے۔

برطانوی میڈیا کے مطابق ورلڈ ٹیسٹ چیمپئن شپ (ڈبلیو ٹی سی) کو موجودہ ٹیموں سے بڑھا کر 12 ٹیموں پر مشتمل کرنے کی تجویز بھی پیش کی جا سکتی ہے، جبکہ ایک واحد ٹیسٹ میچ کو بھی ڈبلیو ٹی سی پوائنٹس سسٹم میں شامل کرنے کی تجویز پر غور کیے جانے کا امکان ہے۔

آئی سی سی کی سالانہ کانفرنس 8 سے 11 جولائی تک اسکاٹ لینڈ کے شہر ایڈنبرگ میں منعقد ہوگی، جہاں مختلف کرکٹ بورڈز کے نمائندے ان تجاویز پر تبادلہ خیال کریں گے۔