جامعہ غوثیہ ٹرسٹ لوٹن میں 43ویں سالانہ جشنِ میلاد مصطفیٰ ﷺ کانفرنس، معروف علما و ثنا خوانوں کی شرکت

لوٹن (صداۓ سچ نیوز) جامعہ غوثیہ ٹرسٹ لوٹن میں بارہ ربیع الاول کے موقع پر جشنِ میلاد مصطفیٰ ﷺ کی 43ویں سالانہ محفل عقیدت و احترام کے ساتھ منعقد ہوئی، جس میں پاکستان، یورپ اور برطانیہ سے تعلق رکھنے والے معروف علما، خطیب اور ثنا خوان حضرات نے شرکت کی۔

محفل کی صدارت چراغِ گولڑہ، جانشینِ نصیرِ ملت پیر سید غلام نجم الدین گیلانی آف گولڑہ شریف اور پیر سید بلال چشتی آف اجمیر شریف نے کی۔ اس موقع پر علامہ انور قریشی، علامہ طیب الرحمن ہزاروی، صاحبزادہ ضیاء المصطفیٰ اور علامہ صاحبزادہ فضل محمد نے خطاب کرتے ہوئے حضور نبی کریم ﷺ کی ذاتِ اقدس کو مسلمانوں کے لیے مشعلِ راہ قرار دیا اور آپ ﷺ کی تعلیمات پر عمل پیرا ہونے پر زور دیا۔

مقررین نے بالخصوص نوجوان نسل کو سیرتِ طیبہ سے رہنمائی حاصل کرنے کی دعوت دی اور حضور اکرم ﷺ کے معجزات اور آپ ﷺ کی شان و عظمت کو اجاگر کیا۔

محفل میں پاکستان، یورپ اور برطانیہ کے معروف ثنا خوانوں، جن میں سید الطاف حسین شاہ، عدنان علی حسینی، حافظ احمد رضا قادری، قاری نجم مصطفیٰ اور محمد عادل قریشی شامل تھے، نے بارگاہِ رسالت ﷺ میں نذرانۂ عقیدت پیش کیا۔

جشنِ میلاد مصطفیٰ ﷺ کی اس بابرکت محفل میں لوٹن اور ملحقہ علاقوں سے بڑی تعداد میں عاشقانِ رسول ﷺ نے شرکت کی۔ محفل کے دوران روحانی و ایمانی کیفیت برقرار رہی اور شرکا نے بارگاہِ رسالت ﷺ میں محبت و عقیدت کا اظہار کیا۔

اس موقع پر بعض عاشقانِ مصطفیٰ ﷺ نے میڈیا نمائندگان سے گفتگو کرتے ہوئے جامعہ غوثیہ ٹرسٹ کے بانی و انچارج اور محفل کے بانی مولانا عبدالعزیز چشتی کی دینی و سماجی خدمات کو خراجِ تحسین پیش کیا۔ انہوں نے کہا کہ لوٹن کی عوام کے لیے علامہ عبدالعزیز چشتی کی خدمات قابلِ قدر ہیں اور انہیں ہمیشہ یاد رکھا جائے گا۔

شرکا نے کامیاب اور بابرکت سالانہ محفل کے انعقاد پر جامعہ غوثیہ ٹرسٹ کی انتظامیہ، منتظمین اور علامہ عبدالعزیز چشتی کو مبارکباد پیش کی۔