پاکستان کی معاشی شرح نمو مقررہ ہدف سے کم رہنے، مہنگائی بڑھنے کا خدشہ

ایشیائی ترقیاتی بینک نے پاکستان کی معاشی صورتحال پر رپورٹ جاری کردی۔

ایشیائی ترقیاتی بینک کی رپورٹ کے مطابق پاکستان کی معاشی کارکردگی میں بہتری کے باوجود رواں مالی سال شرح نمو حکومتی ہدف سے کم اور مہنگائی بڑھنے کا خدشہ ہے۔ پاکستان میں شرح نمو 3.7 فیصد رہنے کا امکان ہے جبکہ حکومت نے 4 فیصد کا ہدف مقرر کر رکھا ہے۔ اوسط مہنگائی 8.3 فیصد تک پہنچ سکتی ہے۔

رپورٹ کے مطابق توانائی، لاجسٹکس اور زرعی لاگت میں اضافہ مہنگائی پر دباؤ ڈالے گا جبکہ مشرق وسطیٰ کی کشیدگی سے تیل کی درآمدی لاگت بڑھنے اور خلیجی ممالک میں معاشی سرگرمی متاثر ہونے سے پاکستانی ترسیلات زر میں کمی کا خطرہ ہے۔

ٹیکس آمدن میں کمی، زرعی شعبے کو موسمی نقصانات اور توانائی و سرکاری اداروں کی اصلاحات میں تاخیر کو بھی معیشت کے لیے خطرات قرار دیا گیا ہے۔

ایشیائی ترقیاتی بینک کے مطابق مالی سال 2025-26 میں شرح نمو 3.7 فیصد رہی جو گزشتہ مالی سال کے 3.2 فیصد سے بہتر ہے جبکہ معاشی اصلاحات، زرمبادلہ ذخائر، نجی سرمایہ کاری اور عالمی مالیاتی منڈی تک دوبارہ رسائی نے معیشت کو سہارا دیا۔

رپورٹ کے مطابق اپریل اور مئی میں یورو اور پانڈا بانڈز کے اجرا نے بھی پاکستان کے لیے دوبارہ عالمی مارکیٹ کے دروازے کھولے۔ ایس اینڈ پی اور موڈیز نے 2026 میں پاکستان کی کریڈٹ ریٹنگ بہتر کی تاہم اے ڈی بی نے مالی اور بیرونی استحکام کے لیے اصلاحات کا تسلسل ضروری قرار دیا ہے۔