پولیس نے سعد رضوی اور انس رضوی کا سراغ لگا لیا، گرفتاری کسی بھی وقت متوقع

لاہور(صدائے سچ نیوز) تحریک لبیک پاکستان (ٹی ایل پی) کے سربراہ سعد رضوی اور ان کے بھائی انس رضوی، ایک روز کی روپوشی کے بعد آخرکار پولیس کی نظروں میں آگئے ہیں۔

پنجاب پولیس نے خفیہ ذرائع اور جدید ٹیکنیکل ٹریکنگ کے ذریعے دونوں رہنماؤں کا ٹھکانہ معلوم کرنے کا دعویٰ کیا ہے، اور امکان ظاہر کیا ہے کہ ان کی گرفتاری جلد عمل میں آ سکتی ہے۔

ذرائع کے مطابق سعد رضوی اور انس رضوی اتوار کی رات مریدکے میں ہونے والے پرتشدد مظاہروں کے بعد منظرِ عام سے غائب ہوگئے تھے۔ پولیس کے مطابق مظاہرین کو منتشر کرنے کی کارروائی کے دوران ایک پولیس افسر شہید جبکہ درجنوں اہلکار زخمی ہوئے۔

پولیس حکام کا کہنا ہے کہ دونوں رہنماؤں کو پرامن طور پر خود سپردگی کی ہدایت دی گئی ہے۔ ترجمان پنجاب پولیس نے واضح کیا کہ اگر وہ زخمی ہیں تو ریاست ان کا علاج کرانے کے لیے تیار ہے، تاہم اب تک ان کے زخمی ہونے کی تصدیق نہیں ہوسکی۔

پولیس نے عوام کو بھی خبردار کیا ہے کہ اگر کسی نے دونوں رہنماؤں کی معاونت کی تو اس کے خلاف سخت قانونی کارروائی کی جائے گی۔