عید الاضحیٰ 27 مئی بروز بدھ ہونے کا قوی امکان

سپارکو نے ذوالحج 1447 ہجری کے چاند کی متوقع رویت سے متعلق فلکیاتی پیشگوئی جاری کردی۔

ترجمان سپارکو کے مطابق نیا چاند 17 مئی کو رات ایک بج کر ایک منٹ پر پیدا ہونے کا امکان ہے جبکہ اسی روز شام کے وقت چاند کی عمر تقریباً 18 گھنٹے 30 منٹ متوقع ہے۔ ساحلی علاقوں میں غروبِ آفتاب اور غروبِ ماہتاب کے درمیان تقریباً ساٹھ منٹ کا وقفہ ہوگا، جس کے باعث صاف موسم اور بہتر حدِ نگاہ کی صورت میں چاند نظر آنے کے امکانات روشن ہیں۔

ترجمان سپارکو کا کہنا ہے کہ اگر رویت کے امکانات اسی طرح برقرار رہے تو یکم ذوالحج 18 مئی بروز پیر اور 10 ذوالحج یعنی عید الاضحیٰ 27 مئی بروز بدھ کو ہونے کے امکانات ہیں۔

ترجمان سپارکو نے واضح کیا ہے کہ ذوالحج کے چاند کی رویت سے متعلق حتمی اعلان مرکزی رویتِ ہلال کمیٹی کرے گی جو ملک بھر سے موصول ہونے والی معتبر شہادتوں کی بنیاد پر اپنا فیصلہ سنائے گی۔