کلر کہار موٹروے پر بریک فیل ہونے سے ٹریلر الٹ گیا، خوفناک آگ بھڑک اٹھی، ایک شخص جاں بحق، ایک زخمی

کلر کہار( صداۓ سچ نیوز) لاہور سے اسلام آباد جانے والی موٹروے پر کلر کہار کے قریب بریک فیل ہونے کے باعث ایک ٹریلر بے قابو ہو کر الٹ گیا، جس کے نتیجے میں ٹریلر میں خوفناک آگ بھڑک اٹھی۔ حادثے میں ایک شخص جاں بحق جبکہ ایک شخص زخمی ہوگیا، جسے فوری طور پر طبی امداد کے لیے ہسپتال منتقل کر دیا گیا۔

حادثے کی اطلاع ملتے ہی موٹروے پولیس بیٹ 7 کلر کہار کے اہلکار فوری طور پر موقع پر پہنچ گئے اور امدادی کارروائیاں شروع کر دیں۔ موٹروے پولیس کے ہیڈ کانسٹیبل شہزاد، کانسٹیبل ذیشان اور سولین اہلکار وہاب علی نے غیر معمولی مستعدی اور پیشہ ورانہ مہارت کا مظاہرہ کرتے ہوئے آگ پر قابو پانے میں اہم کردار ادا کیا۔

اہلکاروں کی بروقت کارروائی کے باعث آگ کو مزید پھیلنے سے روکنے اور جائے حادثہ پر امدادی سرگرمیوں کو مؤثر بنانے میں مدد ملی۔

حادثے کے نتیجے میں ایک قیمتی انسانی جان ضائع ہونے پر افسوس کا اظہار کیا جا رہا ہے جبکہ زخمی شخص کو علاج معالجے کے لیے ہسپتال پہنچا دیا گیا ہے۔

موٹروے پولیس کے اہلکاروں کی بروقت رسپانس، فرض شناسی اور انسانی جانوں کے تحفظ کے لیے عملی کوششیں قابلِ تحسین ہیں۔ ایسے مواقع پر پولیس اہلکاروں کا فوری اقدام نہ صرف مزید نقصان سے بچانے میں مددگار ثابت ہوتا ہے بلکہ عوام کے تحفظ کے لیے ان کی ذمہ دارانہ خدمات کو بھی نمایاں کرتا ہے۔