امریکا، کروز جہاز میں ’نورووائرس‘ پھیل گیا، سیکڑوں مسافر بیمار

واشنگٹن (صداۓ سچ نیوز) امریکا سے روانہ ہونے والے سیاحتی جہاز ’کیریبیئن پرنسس‘ میں متعدی معدے کے وائرس نے درجنوں افراد کو متاثر کر دیا۔

بین الاقوامی میڈیا رپورٹس کے مطابق جہاز میں سوار 3000 سے زائد افراد میں سے 102 مسافر اور 13 عملے کے ارکان وائرس کا شکار ہو چکے ہیں۔

یہ جہاز 28 اپریل کو فلوریڈا سے 11 روزہ سفر پر روانہ ہوا تھا، متاثرہ افراد میں الٹی، اسہال اور معدے کی مختلف تکالیف کی علامات سامنے آئی ہیں۔

امریکی ادارۂ صحت کے مطابق یہ وائرس نہایت تیزی سے ایک شخص سے دوسرے شخص میں منتقل ہوتا ہے۔

دوسری جانب کروز کمپنی نے اپنے بیان میں کہا ہے کہ جہاز کے تمام حصوں میں فوری صفائی اور جراثیم کش اسپرے کر دیا گیا ہے جبکہ بیمار افراد کو الگ رکھا گیا ہے، حکام نے مزید جانچ کے لیے نمونے بھی حاصل کر لیے ہیں۔

یہ بھی پڑھیں: مریم نواز کو بطور ضمانت جمع کرائے گئے7 کروڑ روپے واپس دینے کی ہدایت

بین الاقوامی میڈیا رپورٹس کے مطابق یہ وائرس آلودہ خوراک، پانی، متاثرہ شخص یا گندی سطح کو چھونے سے پھیل سکتا ہے، مریض صحت یاب ہونے کے بعد بھی کئی دن تک دوسروں کو وائرس منتقل کر سکتا ہے۔

رپورٹس کے مطابق رواں سال اس کروز کمپنی کے جہاز میں وائرس پھیلنے کا یہ دوسرا جبکہ مجموعی طور پر چوتھا واقعہ ہے۔