کسی دوسرے ملک کے واقعات کو بنیاد بنا کر پاکستان میں تشدد ہرگز برداشت نہیں کیا جائے گا، فیلڈ مارشل

راولپنڈی (صداۓ سچ نیوز) فیلڈ مارشل سید عاصم منیر نے کہا ہے کہ پاکستان اپنی سرزمین پر دہشتگردی کیلئے افغان سر زمین کے استعمال کو ہرگز برداشت نہیں کرے گا۔

پاک فوج کے شعبہ تعلقات عامہ (آئی ایس پی آر) کے مطابق راولپنڈی میں سید عاصم منیر سے اہلِ تشیع مکتبِ فکر کے علما نے ملاقات کی،ملاقات کے دوران قومی سلامتی اور معاشرتی ہم آہنگی کے فروغ میں علما کے کردار پر تفصیلی تبادلہ خیال کیا گیا۔

فیلڈ مارشل عاصم منیر نے اس موقع پر کہا کہ گمراہ کن معلومات اور فرقہ وارانہ بیانیے کے خلاف علما کا کردار انتہائی اہم ہے، جبکہ اتحاد، برداشت اور قومی یکجہتی کے فروغ میں بھی ان کی ذمہ داری کلیدی حیثیت رکھتی ہے۔

انہوں نے واضح کیا کہ مذہبی جذبات کو تشدد بھڑکانے کے لیے استعمال نہیں ہونا چاہیے اور کسی دوسرے ملک کے واقعات کو بنیاد بنا کر پاکستان میں تشدد ہرگز برداشت نہیں کیا جائے گا۔

فیلڈ مارشل نے شرکا کو خطے میں کشیدگی کم کرنے کے لیے پاکستان کی سفارتی کوششوں سے بھی آگاہ کیا اور کہا کہ افغان طالبان اپنی سرزمین کو پاکستان کے خلاف دہشتگردی کے لیے استعمال ہونے سے روکیں۔

فیلڈ مارشل کا کہنا تھا کہ پاکستان اپنی سرزمین پر دہشتگردی کے لیے افغان سرزمین کے استعمال کو کسی صورت برداشت نہیں کرے گا۔

ملاقات کے دوران فیلڈ مارشل نے آپریشن “غضب للحق” کا حوالہ بھی دیا، جبکہ علما نے خطے میں امن و استحکام کی خواہش کا اظہار کیا اور مذہب کے نام پر تشدد کی مذمت کی۔

علما نے قانون نافذ کرنے والے اداروں کو مکمل حمایت کی یقین دہانی بھی کرائی۔