روضۂ معصومۂ سندھ کی تعمیر میں حائل مسائل ایک ہفتے میں دور کرنے کی یقین دہانی

کراچی (صداۓ سچ نیوز) روضۂ اطہر بی بی ماہم المعروف معصومۂ سندھ، اگھم کوٹ کی سرکاری تعمیر میں مسلسل تاخیر اور درپیش مسائل کے حوالے سے آج کرچی ایڈیٹرز کلب کے خصوصی اشتراک سے کراچی میں منعقدہ اہم اجلاس کے دوران زائرین خدمت کمیٹی کے رکن بریگیڈیئر (ر) سید کرار حسین عابدی نے صوبائی وزیرِ اوقاف سید ریاض حسین شاہ شیرازی اور چیف ایڈمنسٹریٹر اوقاف سندھ حیدرآباد مختار حسین ابڑو سے ٹیلی فون پر رابطہ کرکے انہیں درپیش جملہ صورتحال سے تفصیلی طور پر آگاہ کیا۔ دونوں حکام نے شکایات کو سنجیدگی سے سنتے ہوئے ایک ہفتے کے اندر مسائل کے ازالے اور تعمیراتی کام میں حائل جملہ رکاوٹیں دور کرانے کی یقین دہانی کرائی۔

زائرین خدمت کمیٹی اگھم کوٹ کے سید منظر نقوی کی زیرِ صدارت اور کراچی ایڈیٹرز کلب کے اشتراک سے کراچی میں منعقدہ اہم اجلاس میں روضۂ اطہر کی تعمیر میں غیرمعمولی طویل تاخیر، کام کی انتہائی سست رفتاری اور متعلقہ اداروں و سرکاری ٹھیکیدار کی مبینہ غفلت پر شدید تشویش کا اظہار کیا گیا۔ شرکاء نے کہا کہ منصوبہ کبھی ٹیکنیکل وجوہات، کبھی تعمیراتی نرخوں پر نظرثانی اور کبھی مختلف انتظامی مسائل کی آڑ میں مسلسل تاخیر کا شکار بنایا جا رہا ہے، جس کے باعث اس کی تکمیل غیرضروری طور پر طول پکڑتی جارہی ہے۔

اجلاس میں کہا گیا کہ زائرین خدمت کمیٹی اور سندھ کی مختلف عزادار تنظیموں اور انجمنوں کی جانب سے ماضی میں بھی تعمیراتی کام کی سست رفتاری اور محکمۂ اوقاف، سرکاری ٹھیکیدار اور دیگر متعلقہ افراد کی مبینہ غفلت کی بارہا نشاندہی کی گئی۔ شرکاء کے مطابق جب بھی ان مسائل کے خلاف آواز اٹھائی گئی یا احتجاج کیا گیا تو تعمیراتی رکاوٹیں فوری دور کرنے اور کام جلد از جلدمکمل کروانے کی یقین دہانیاں کرائی گئیں، تاہم بعد ازاں صورتحال دوبارہ جمود کا شکار بنادی جاتی ہے۔
شرکاء نے کہا کہ حالیہ عرصے میں بھی تین سے چار مرتبہ تعمیراتی کام تیز کرنے اور بعض اہم مراحل ایامِ عزا سے قبل مکمل کرنے کے وعدے کیے گئے، لیکن ایامِ عزا کے اختتام کے باوجود بھی وہ کام بدستور نامکمل ہی ہیں۔

اجلاس کو بتایا گیا کہ گزشتہ 15 سے 20 روز سے تعمیراتی مقام پر صرف تین مزدوروروں کی جانب سے صرف ایک ہی کالم کی بھرائی کا کام انتہائی سست رفتاری سے جاری ہے۔ شرکاء نے اسے منصوبے کی نگرانی اور چیک اینڈ بیلنس کے ذمہ دار متعلقہ سرکاری اداروں اور کمیٹیوں کی کارکردگی پر ایک بڑا سوالیہ نشان قرار دیا۔

اجلاس میں اس امر پر بھی تشویش ظاہر کی گئی کہ تعمیراتی منصوبے سے متعلق عوامی تحفظات اور احتجاج سامنے آنے پر مستقل حل کے بجائے وقتی یقین دہانیوں سے کام لیا جاتا رہا ہے۔ شرکاء کے مطابق احتجاج ختم ہونے کے بعد تعمیراتی سرگرمیاں دوبارہ سست روی کا شکار بنا دی جاتی ہیں، جس سے زائرین اور متعلقہ تنظیموں میں بے چینی بڑھ رہی ہے۔
اجلاس میں بریگیڈیئر (ر) سید کرار حسین عابدی، سینئر صحافی نذیر لغاری، مبشر میر، سید کمال امروہوی، سفارتکار حسن حبیب، سید شبر نقوی، عاکف اشعر، علی زیب، احمد ملک اور دیگر نے شرکت کی، جبکہ زوم کانفرنس کال کے ذریعے حیدرآباد سے زوار عبدالستار درس، اگھم کوٹ سے غلام حیدر لغاری، میرپورخاص سے ایڈووکیٹ ڈاکٹر میر اعجاز علی تالپور اور ٹنڈوجام سے میر امداد علی تالپور سمیت دیگر شخصیات نے بھی شرکت کرکے اپنے تحفظات کا اظہار کرتے ہوئے مثبت تجاویز پیش کیں۔

اجلاس میں سرکاری ٹھیکیدار کی جانب سے تعمیراتی کام کو مبینہ طور پر غیرضروری طول دینے کے طرزِ عمل کی شدید مذمت کرتے ہوئے متعلقہ حکام سے مطالبہ کیا گیا کہ ایک ہفتے کے اندر مسائل کے ازالے کی کروائی گئی یقین دہانی کو عملی شکل دی جائے، تعمیراتی کام کی رفتار فوری طور پر بڑھائی جائے اور مؤثر سرکاری نگرانی کے ذریعے روضۂ اطہر بی بی ماہم معصومۂ سندھ کی تعمیر کو مزید تاخیر کے بغیر جلد از جلد پایۂ تکمیل تک پہنچایا جائے۔