اٹک کے ایم این اے کی بہن کا پٹرول پمپ جعل سازی سے فروخت

راولپنڈی(صدائے سچ نیوز) باپ بیٹے نے فراڈ اور جعل سازی سے خاتون کا پٹرول پمپ اپنے نام کروانے کے بعد تیسری پارٹی کو فروخت کر دیا۔

لاہور کے رہائشی سردار غضنفر علی اور اس کے بیٹے عمیر حیدر غضنفر نے ریکارڈ میں جعل سازی کر کے اٹک سے پاکستان مسلم لیگ ن کے رکن قومی اسمبلی ملک سہیل خان کی ہمشیرہ شاہین خالد کا ملکیتی پٹرول پمپ اپنے نام کروالیا اور بعد ازاں فروخت کا جعلی معاہدہ تیار کر کے یہی پٹرول پمپ احد نامی تیسرے شخص کو فروخت کر دیا۔

یہ بھی پڑھیں: حکومت  27ویں آئینی ترمیم لا رہی ہے، اتحادی جماعتوں کو اعتماد میں لیا جائے گا، اسحاق ڈار

فتح جنگ میں واقع مذکورہ پٹرول پمپ شاہین خالد نے سال 2009 میں خریدا تھا۔ملزم سردار غضنفر علی کو پٹرول پمپ کے روز مرہ معاملات چلانے کے لیے ملازم رکھا گیا تھا لیکن اس نے پمپ مالک کے اعتماد کو توڑتے ہوئے منصوبہ بندی کے تحت اسے کاروبار سے محروم کر دیا۔

ملزمان کے خلاف تھانہ فتح جنگ میں مقدمہ درج کر لیا گیا ہے۔ تاہم ابھی تک کوئی گرفتاری عمل میں نہیں کرائی۔

شاہین خالد کی درخواست پرآئی جی پنجاب پولیس کی ہدایت پر ڈی پی او اٹک نے ڈی ایس پی فتح جنگ کی سربراہی میں ملزمان کی گرفتاری اور تفتیش کے لئے خصوصی ٹیم تشکیل دے دی ہے۔

شاہین خالد نے وزیراعلی پنجاب سے اپیل کی ہے کہ ملزمان کو بلا تاخیر گرفتار کیا جائے اور سائلہ کو انصاف مہیا کیا جائے۔