بھارتی میچ کا کنٹرول ہمارے ہاتھ میں نہیں، حکومت نے فیصلہ کرنا ہے، سلمان علی آغا

کولمبو (صداۓ سچ نیوز) قومی کرکٹ ٹیم کے کپتان سلمان علی آغا نے کہا کہ بھارتی میچ کا کنٹرول ہمارے ہاتھ میں نہیں۔ اس کا فیصلہ حکومت نے ہی کرنا ہے۔

ورلڈکپ سے قبل منعقدہ پریس کانفرنس میں پاکستان کرکٹ ٹیم کے کپتان سلمان علی آغا نے شرکت کی اور ٹیم کی تیاریوں سمیت اہم امور پر گفتگو کی۔

قومی کرکٹ ٹیم کے کپتان سلمان علی آغا نے بھارت کے خلاف ممکنہ میچ سے متعلق سوال پر کہا کہ بھارتی ٹیم کے ساتھ میچ کا کنٹرول ہمارے ہاتھ میں نہیں۔ اس حوالے سے حکومت جو فیصلہ کرے گی ہم اس کا احترام کریں گے۔

انہوں نے کہا کہ ہمیں فی الحال یہ اندازہ نہیں کہ بھارت کے ساتھ میچ ہو گا یا نہیں۔ تاہم قومی ٹیم حکومت کی پالیسی کے مطابق ہی آگے بڑھے گی۔

قومی ٹیم کے کپتان نے کہا کہ یہ بطور کپتان ان کا پہلا ورلڈ کپ ہے۔ اور وہ اس حوالے سے خاصے پُرجوش ہیں۔ انہوں نے امید ظاہر کی کہ ان کی قیادت میں ٹیم شائقین کو اچھا کھیل دیکھنے کو دے گی۔

سلمان علی آغا نے اعتراف کیا کہ پچھلے ٹورنامنٹس میں ٹیم وہ کارکردگی نہ دکھا سکی جس کی شائقین کو توقع تھی۔ تاہم ہر نئے ٹورنامنٹ میں نئی امید اور جذبے کے ساتھ میدان میں اترتے ہیں۔

انہوں نے کہا کہ اس مرتبہ ٹیم اچھی کرکٹ کھیل رہی ہے اور امید ہے۔ کہ ورلڈ کپ میں بھی اچھی کارکردگی کا مظاہرہ کیا جائے گا۔

انہوں نے بنگلہ دیشی ٹیم کے ورلڈ کپ میں شامل نہ ہونے کو افسوسناک قرار دیا۔ اور کہا کہ گزشتہ 6 ماہ سے قومی ٹیم مسلسل اچھی کرکٹ کھیل رہی ہے۔ اور ٹیم کے تمام شعبوں کو بہتر بنانے کی کوشش کی گئی ہے۔

سلمان علی آغا نے سری لنکا کے بارے میں گفتگو کرتے ہوئے کہا کہ سری لنکا ان کے لیے دوسرے گھر کی طرح ہے، یہاں کے لوگ نہایت اچھے اور اخلاق والے ہیں۔ انہوں نے کہا کہ جب بھی سری لنکا آکر کرکٹ کھیلی، ہمیشہ اچھا محسوس کیا۔

پریس کانفرنس کے اختتام پر قومی ٹیم کے کپتان نے اس عزم کا اظہار کیا کہ پاکستان ٹیم ورلڈکپ میں اچھی اور مثبت کرکٹ کھیلنے کی بھرپور کوشش کرے گی۔