پاکستان امن و استحکام کے پل کا کردار ادا کر سکتا ہے، مقررین کا مکالمہ، سفارتکاری اور ذمہ دارانہ ابلاغ پر زور

لاہور(صداۓ سچ نیوز) مقررین نے کہا ہے کہ پاکستان خطے میں پائیدار امن و استحکام، علاقائی تعاون اور مختلف اقوام کے درمیان مکالمے کے فروغ کے لیے مؤثر پل کا کردار ادا کر سکتا ہے۔ انہوں نے کہا کہ پائیدار امن کے لیے مذاکرات، سفارتکاری، معاشی تعاون، تعلیم اور نوجوانوں کی شمولیت کو فروغ دینا وقت کی اہم ضرورت ہے۔

ان خیالات کا اظہار مقررین نے پریس انفارمیشن ڈیپارٹمنٹ لاہور اور شعبہ ڈیجیٹل میڈیا پنجاب یونیورسٹی لاہور کے اشتراک سے ’’پاکستان بحیثیت امن و استحکام کا پل: آگے بڑھنے کا راستہ‘‘ کے موضوع پر منعقدہ پینل ڈسکشن سے خطاب کرتے ہوئے کیا۔

معروف صحافی مجیب الرحمن شامی نے کہا کہ پاکستان کا جغرافیائی محل وقوع اسے جنوبی ایشیا، وسطی ایشیا، مشرق وسطیٰ اور چین کے درمیان اہم رابطے کی حیثیت دیتا ہے۔ ان کا کہنا تھا کہ پاکستان مختلف خطوں اور اقوام کے درمیان مکالمے، تعاون اور امن کے فروغ میں اہم کردار ادا کر سکتا ہے۔

کالم نگار سلمان غنی نے کہا کہ پاکستان خطے میں کشیدگی کے خاتمے کے لیے مذاکرات اور سفارتی ذرائع کو ترجیح دیتا آیا ہے۔ انہوں نے کہا کہ میڈیا رائے عامہ کی تشکیل میں اہم کردار ادا کرتا ہے، اس لیے غلط معلومات، جعلی خبروں اور اشتعال انگیز بیانیے کے بجائے تحقیق، تصدیق اور ذمہ دارانہ صحافت کو فروغ دینا ہوگا۔

ڈی جی پریس انفارمیشن ڈیپارٹمنٹ شفقت عباس نے کہا کہ نوجوان پاکستان کا قیمتی سرمایہ ہیں، انہیں جدید تعلیم، ٹیکنالوجی، تحقیق اور مثبت سوچ کے مواقع فراہم کرنا ضروری ہے۔ انہوں نے کہا کہ ڈیجیٹل دور میں میڈیا لٹریسی، تحقیق، تصدیق اور تنقیدی سوچ کی اہمیت مزید بڑھ گئی ہے۔

سینئر تجزیہ نگار ارشاد عارف نے کہا کہ امن و استحکام کے لیے قومی سطح پر اتفاق رائے اور ذمہ دارانہ سیاسی رویوں کی ضرورت ہے۔ انہوں نے کہا کہ پاکستان کا عالمی کردار اس کی داخلی مضبوطی سے بھی جڑا ہوا ہے۔

کالم نگار محمد مہدی نے کہا کہ پاکستان کو معاشی خود مختاری یقینی بنانے اور خارجہ پالیسی میں معاشی مفادات اور علاقائی تعاون کو بنیادی اہمیت دینے کی ضرورت ہے۔ انہوں نے امن، مکالمہ، تعلیم، معاشی تعاون اور علاقائی روابط کو قومی پالیسی کا حصہ بنانے پر زور دیا۔

ڈین یونیورسٹی آف لاہور ڈاکٹر فریحہ کاظمی اور سربراہ شعبہ ڈیجیٹل میڈیا پنجاب یونیورسٹی ڈاکٹر سویرا شامی نے بھی خطاب کیا۔ مقررین نے کہا کہ پاکستان کے روشن اور پرامن مستقبل کے لیے ریاستی اداروں، سیاسی قیادت، میڈیا، جامعات، دانشوروں، سول سوسائٹی اور نوجوانوں کو مشترکہ قومی وژن کے تحت اپنا کردار ادا کرنا ہوگا۔

تقریب کے دوران خطے میں قیام امن کے لیے حکومتی کوششوں کے حوالے سے دستاویزی فلم بھی دکھائی گئی جبکہ طلبہ نے مقررین سے مختلف سوالات کیے۔