ایران کا آبنائے ہرمز میں تیل اسمگلنگ کے غیر قانونی راستے جلد بند کرنے کا اعلان

تہران (صداۓ سچ نیوز) ایران نے بہت جلد آبنائے ہرمز میں تیل کی اسمگلنگ کے غیر قانونی راستے بند کرنے کا اعلان کردیا۔

پاسداران انقلاب ایران کے اعلامیے کے مطابق تیل اسمگلنگ کے عمانی ساحل کے قریب موجود غیر قانونی راستے جلد بند کریں گے، یہ وہی راستے ہیں جن کے استعمال کے دعوے سامنے آئے ہیں۔

میڈیا رپورٹس کے مطابق پاسداران انقلاب کے مشیر محمد رضا نقدی نے کہا کہ آبنائے ہرمز پر ایران کا مکمل کنٹرول ہے، جب تک ہمارے جائز مطالبات تسلیم نہیں کیے جاتے، صورتحال برقرار رہے گی۔

ایرانی حکام کے مطابق 28 فروری کے امریکا، اسرائیل حملے اور سپریم لیڈر کی شہادت کے بعد سے آبی گزرگاہ پر تہران کا مکمل کنٹرول ہے اور روزانہ صرف 10 جہاز گزر رہے ہیں۔

ایرانی حکام کے مطابق امریکا اور اسرائیل کے حملے سے قبل آبنائے ہرمز سے یومیہ 125 بحری جہاز گزرتے تھے، ہم امریکی بحریہ کی مدد سے تیل بحالی کے دعوے مسترد کرتے ہیں۔

دوسری طرف جہاز رانی کے عالمی اعداد و شمار کے مطابق ستمبر کے دوران خلیجی خطے سے تیل کی یومیہ برآمدات میں کچھ بہتری دیکھی گئی ہے لیکن ٹینکرز پر ایرانی حملوں کے باعث تیل کی برآمدی سطح کی پائیداری پر سوالات اٹھ گئے ہیں۔