بجلی کی قیمت، تبدیلیوں کا بوجھ متوسط یا کم آمدنی والے طبقے پر نہیں پڑنا چاہیے، آئی ایم ایف

نیو یارک (صدائے سچ نیوز) آئی ایم ایف نے کہا ہے کہ پاکستانی حکام کے ساتھ بجلی کی قیمتوں میں مجوزہ تبدیلیوں پر بات چیت ہو رہی ہے۔

خبر رساں ادارے رائٹرز کا کہنا ہے کہ آئی ایم ایف کی پاکستانی حکام کے ساتھ مجوزہ بجلی ٹیرف پر بات چیت جاری ہے، آئی ایم ایف کا کہنا تھا کہ ان تبدیلیوں کا بوجھ متوسط یا کم آمدنی والے طبقے پر نہیں پڑنا چاہیے۔

آئی ایم ایف نے کہا کہ جائزہ لیا جائے گا کہ آیا نرخوں میں مجوزہ تبدیلیاں وعدوں سے مطابقت رکھتی ہیں یا نہیں اور دیکھاجائے گا کہ مہنگائی سمیت مجموعی معاشی استحکام پر کیا اثرات پڑ سکتے ہیں۔

رائٹرز کا کہنا ہے کہ پاکستان کے کنزیومر پرائس انڈیکس میں بجلی نمایاں اہمیت رکھتی ہے، جس کی وجہ سے نرخوں میں تبدیلی اس وقت انتہائی حساس ہو جاتی ہے جب مہنگائی ایک اہم سیاسی اور معاشی دباؤ کا نکتہ بنی ہوئی ہے۔