پی ایس ایل 11 کے پہلے میچ کے لیے لاہور کی کونسی سڑکیں بند ہونگی؟

لاہور (صداۓ سچ نیوز) لاہور میں پی ایس ایل 11 کے افتتاحی میچ کے لیے ٹریفک پولیس نے انتظامات مکمل کر لیے ہیں، تاہم شہریوں کے لیے بڑی خبر یہ ہے کہ کسی بھی مرکزی سڑک کو مستقل طور پر بند نہیں کیا جائے گا۔

سی ٹی او لاہور اطہر وحید کے مطابق آج کے میچ کے دوران تقریباً 900 ٹریفک اہلکار ڈیوٹی پر مامور ہوں گے تاکہ ٹریفک کی روانی برقرار رکھی جا سکے۔

انہوں نے واضح کیا کہ مال روڈ، جیل روڈ اور کینال روڈ سمیت تمام اہم شاہراہیں ٹریفک کے لیے کھلی رہیں گی، جبکہ میچ کے دوران صرف وقتی طور پر معمولی رکاوٹیں پیدا ہو سکتی ہیں۔

پی ایس ایل 11 کا افتتاحی میچ لاہور کے قذافی اسٹیڈیم میں کھیلا جائے گا، جہاں دفاعی چیمپئن لاہور قلندرز کا مقابلہ نئے شامل ہونے والی ٹیم حیدرآباد کنگزمن سے ہوگا۔ حکومتی کفایت شعاری پالیسی کے تحت میچ بغیر تماشائیوں کے کھیلا جائے گا۔

تمام ٹیموں کے کپتانوں نے ٹورنامنٹ سے قبل مشترکہ پریس کانفرنس میں شرکت کی اور ایونٹ کے مسابقتی ہونے کی امید ظاہر کی، تاہم شائقین کی عدم موجودگی کو افسوسناک قرار دیا۔