راولپنڈی میں خاندانی دشمنی کی لرزہ خیز واردات، باپ بیٹا قتل

راولپنڈی (صداے سچ نیوز) ڈھوک گجراں میں دوہرے قتل کی واردات، 40 سالہ امریز خان اور 17 سالہ بیٹا عاطف خان جان سے ہاتھ دھو بیٹھے، علاقے میں خوف و ہراس پھیل گیا

راولپنڈی کے تھانہ نصیر آباد کی حدود ڈھوک گجراں میں خاندانی دشمنی نے ایک اور گھر اجاڑ دیا، جہاں نامعلوم ملزمان نے مبینہ طور پر دیرینہ دشمنی کی بنا پر باپ اور بیٹے کو فائرنگ کرکے قتل کر دیا۔

قتل ہونے والوں میں 40 سالہ امریز خان اور ان کا 17 سالہ بیٹا عاطف خان شامل ہیں، جنہیں ڈھوک گجراں روڈ پر نشانہ بنایا گیا۔ باپ بیٹے کے بہیمانہ قتل کی خبر پھیلتے ہی علاقے میں خوف و ہراس اور سوگ کی فضا پھیل گئی۔

واقعے کی اطلاع ملتے ہی پولیس موقع پر پہنچ گئی، لاشوں کو تحویل میں لے کر ضروری قانونی کارروائی شروع کر دی گئی۔

پولیس نے واقعے کی تحقیقات کا آغاز کر دیا ہے جبکہ قتل کے محرکات اور ملزمان سے متعلق مزید حقائق تفتیش کے بعد سامنے آئیں گے۔