وزیراعظم شہباز شریف کی عراقی صدر سے ملاقات، دوطرفہ تعاون کے فروغ پر اتفاق

انطالیہ (صداے سچ نیوز) وزیراعظم محمد شہباز شریف نے عراقی صدر نزار محمد سعید امیدی سے ملاقات میں عراق کی خودمختاری، علاقائی سالمیت، قومی اتحاد اور استحکام کے لیے پاکستان کی غیر متزلزل حمایت کا اعادہ کیا ہے۔

وزیراعظم آفس کے میڈیا ونگ کے مطابق یہ ملاقات جمعرات کو کوپ 31 کے موقع پر ہوئی، جس میں وزیراعظم نے عراقی صدر اور عوام کو حالیہ پارلیمانی انتخابات کے کامیاب انعقاد اور نئی حکومت کی تشکیل پر مبارکباد دی۔

دونوں رہنماؤں نے پاکستان اور عراق کے دیرینہ برادرانہ تعلقات، اعلیٰ سطح کے روابط اور مختلف شعبوں میں دوطرفہ تعاون کا جائزہ لیا۔ گفتگو میں تجارت، سرمایہ کاری، افرادی قوت، تعمیر نو، زراعت اور دفاع کے شعبوں پر خصوصی توجہ دی گئی۔

وزیراعظم نے پاکستانی زائرین کو سہولیات فراہم کرنے پر عراقی حکومت کے تعاون کو سراہا اور صدر نزار امیدی کو دورہ پاکستان کی دعوت دی۔ دونوں رہنماؤں نے علاقائی و عالمی صورتحال پر تبادلہ خیال کرتے ہوئے کثیرالجہتی فورمز پر قریبی رابطہ کاری اور تعاون جاری رکھنے کے عزم کا اظہار کیا۔