کل تک پٹرول کے 3 جہاز پاکستان پہنچنے کی توقع ہے، وزیر خزانہ

اسلام آباد (صداۓ سچ نیوز) وفاقی وزیر خزانہ محمد اورنگزیب کا کہنا ہے کہ کل تک پٹرول کے 3 جہاز پاکستان پہنچنے کی توقع ہے۔

تفصیلات کے مطابق وزیراعلیٰ سندھ مراد علی شاہ سے وفاقی وزیر خزانہ محمد اورنگزیب اور وزیر پٹرولیم علی پرویز ملک نے ملاقات کی، جس میں توانائی بحران سے نمٹنے کے لیے ہنگامی اقدامات پر غور کیا گیا

ترجمان کے مطابق وزیراعلیٰ ہاؤس کراچی میں ہونے والی ملاقات میں عالمی تیل قیمتوں میں اضافے اور ایندھن ذخائر پر تفصیلی بریفنگ دی گئی۔ وفاقی وزراء نے بتایا کہ مشرق وسطیٰ تنازع بڑھا تو خام تیل کی قیمت 120 ڈالر فی بیرل تک جا سکتا ہے۔

وفاقی وزیر خزانہ محمد اورنگزیب نے کہا تیل کی قیمتوں کے مالی اثرات سے نمٹنے کے لیے متبادل منصوبے تیار کیے جا رہے ہیں۔ کل تک پٹرول کے تین جہاز پاکستان پہنچنے کی توقع ہے، پاکستان کا ماہانہ تیل درآمدی بل 600 ملین ڈالر تک بڑھ سکتا ہے۔

وزیر پیٹرولیم نے کہا آئی ایم ایف سے پٹرولیم لیوی میں ریلیف کی درخواست کرینگے۔ توانائی صورتحال سے نمٹنے کے لیے وفاق اور صوبوں میں قریبی رابطہ جاری رکھنے کا فیصلہ بھی کیا گیا۔

 اجلاس میں ذخیرہ اندوزی روکنے کے لیے وفاق اور صوبوں میں رابطہ بڑھانے کا فیصلہ کیا گیا۔ وفاقی وزراء نے کہا سعودی عرب، عمان اور یو اے ای سے متبادل ایندھن سپلائی پر سفارتی رابطے جاری ہیں۔ آبنائے ہرمز کے علاوہ راستوں سے تیل سپلائی یقینی بنانے کی کوششیں کر رہے ہیں۔

وزیراعلیٰ سندھ کا کہنا تھا کہ توانائی کے ذمہ دارانہ استعمال اور عوامی تعاون کی ضرورت ہے، قومی معیشت کا پہیہ چلتا رکھنا حکومت کی ترجیح ہے، اجلاس میں زیرغور تمام تجاویز کابینہ میں زیر بحث لائیں گے۔