پیر سید عبدالقادر شاہ جیلانیؒ کے صاحبزادے سید امام علی جیلانی پر قاتلانہ حملہ،ایک شخص جانبحق

راولپنڈی (صدائے سچ کرائم نیوز) پیر عبدالقادر شاہ جیلانیؒ کے صاحبزادے سید امام علی جیلانی پر قاتلانہ حملہ کیا گیا ہے،جس کے نتیجے میں ایک شخص شہید جبکہ سید امام علی جیلانی شدید زخمی ہو گئے۔

ذرائع کے مطابق واقعہ مغل پڑی نکہ کے مقام پر تھانہ روات کی حدود ضلع راولپنڈی میں پیش آیا،جہاں نامعلوم مسلح حملہ آوروں نے سید امام علی جیلانی کی گاڑی پر فائرنگ کر دی۔فائرنگ کے نتیجے میں گاڑی میں سوار ایک شخص موقع پر ہی جاں بحق ہو گیا جبکہ سید امام علی جیلانی شدید زخمی ہو گئے۔

سید امام علی جیلانی کو زخمی حالت میں فوری طور پر راولپنڈی منتقل کر دیا گیا۔

واقعے کی اطلاع ملتے ہی پولیس کی بھاری نفری موقع پر پہنچ گئی،جائے وقوعہ کو گھیرے میں لے کر شواہد اکٹھے کر لیے گئے ہیں جبکہ واقعے کی تحقیقات کا آغاز کر دیا گیا ہے۔

پولیس کے مطابق حملہ آوروں کی تلاش جاری ہے اور واقعے کے مختلف پہلوؤں سے تفتیش کی جا رہی ہے۔