امریکا ہرمز سے جہاز نکلوا سکتا ہے تو آ کر دکھائے: پاسداران نیول کمانڈر

تہران (صداۓ سچ نیوز) ایران کے پاسدارانِ انقلاب کے نیول کمانڈر کا کہنا ہے کہ امریکا ہرمز سے جہاز نکلوا سکتا ہے تو آ کر دکھائے۔

غیر ملکی خبر رساں ادارے کے مطابق نیول کمانڈر نے کہا ہے کہ ابھی سمندر میں میزائل اور ڈرون کے علاوہ کچھ بڑا ظاہر ہی نہیں کیا۔

انہوں نے کہا کہ امریکی صدر ڈونلڈ ٹرمپ ابھی تک ہرمز کھولنے کے لیے جہاز نہ بھیج سکے، طاقت کا توازن واضح ہے۔

پاسدارانِ نیول کمانڈر کا کہنا ہے کہ خلیج فارس ہمارا آپریشنل علاقہ ہے، امریکا یہاں سے نکل جائے۔

واضح رہے کہ گزشتہ روز امریکی صدر ڈونلڈ ٹرمپ نے ہر صورت آبنائے ہرمز کھلوانے کا اعلان کیا تھا۔

آبنائے ہرمز کی بندش جاری ہے، ایران نے اعلان کر رکھا ہے کہ گزرنے کی کوشش کرنے والے جہاز کو راکھ میں بدل دیا جائے گا۔

اس معاملے پر امریکی صدر نے کہا تھا کہ وہ ہر صورت آبنائے ہرمز کھلوائیں گے، ناصرف وہاں سے گزرنے والے کمرشل بحری جہازوں کی انشورنس کی جائے گی بلکہ ضرورت پڑنے پر ان کمرشل جہازوں کی حفاظت کے لیے امریکی نیوی ساتھ جائے گی۔