ایم کیو ایم رہنما زاہد ملک کی وزیراعلیٰ مریم نواز کے مؤقف کی حمایت، پیپلز پارٹی پر سیاسی حسد کا الزام

اسلام آباد (صدائے سچ نیوز) ایم کیو ایم کے مرکزی رہنما اور تحریک صوبہ پوٹھوہار کے کنوینر زاہد ملک نے وزیراعلیٰ پنجاب مریم نواز شریف کے پنجاب سے متعلق مؤقف کی مکمل تائید کرتے ہوئے کہا ہے کہ پیپلز پارٹی وزیراعلیٰ پنجاب پر تنقید کرکے سندھ اور کراچی میں اپنی بدترین گورننس کو چھپانا چاہتی ہے۔

انہوں نے کہا کہ پیپلز پارٹی کو سیاسی حسد کے بجائے اپنے صوبے میں کارکردگی دکھانی چاہیے۔ ’’جنہوں نے سندھ کو موئن جو دڑو اور ہڑپہ بنا دیا ہے، انہیں پنجاب کی ترقی ہضم نہیں ہو رہی،‘‘ زاہد ملک نے کہا۔

انہوں نے سوال اٹھایا کہ سندھ کے غریب ہاریوں کا پانی حکمران طبقے کی زمینوں کو کیوں دیا جا رہا ہے؟ اور شاہراہِ بھٹو ایک ہی سیلابی ریلے میں کیوں بہہ گئی؟ پیپلز پارٹی اس کا جواب کیوں نہیں دیتی؟

زاہد ملک کا کہنا تھا کہ سندھ اور کراچی کے عوام کو درپیش مسائل کا جواب وزیراعلیٰ مریم نواز شریف نے نہیں بلکہ پیپلز پارٹی کی صوبائی حکومت نے دینا ہے، جو اپنی ناکامیوں پر پردہ ڈالنے کی کوشش کر رہی ہے۔