رفاہ انٹرنیشنل یونیورسٹی کا مالدیپ کے تعلیمی اداروں کے ساتھ علمی و تحقیقی تعاون کو فروغ دینے کا عزم

اسلام آباد (صداے سچ نیوز) رفاہ انٹرنیشنل یونیورسٹی کے اعلیٰ سطحی وفد نے مالدیپ کے تعلیمی اداروں سے ملاقاتیں کرکے مشترکہ تحقیق، طلبہ و اساتذہ کے تبادلے اور تعلیمی شراکت داری کے امکانات پر تبادلہ خیال کیا۔

وائس چانسلر حسن محمد خان اور ڈپٹی وائس چانسلر پروفیسر ڈاکٹر یاور حیات خان کی قیادت میں وفد نے مالدیپ نیشنل یونیورسٹی کے اشتراک سے منعقدہ پہلی بوتیک انٹرنیشنل کانفرنس آن میڈیکل ایجوکیشن (ICME 2026) میں شرکت کی۔

وفد نے ولا کالج کی قیادت سے بھی ملاقات کی، جس میں مشترکہ تحقیقی منصوبوں، مائیکرو کریڈینشل پروگرامز اور طلبہ و اساتذہ کے تبادلے پر گفتگو ہوئی۔ دونوں اداروں نے تعلیمی روابط کو فروغ دینے میں دلچسپی ظاہر کی۔

مالدیپ میں پاکستان کے ہائی کمشنر ایڈمرل (ریٹائرڈ) فیصل رسول لودھی نے مالے میں وفد کے اعزاز میں ناشتے کا اہتمام کیا، جہاں دوطرفہ تعلقات میں تعلیمی سفارت کاری کی اہمیت اجاگر کی گئی۔

رفاہ یونیورسٹی کے اس دورے کا مقصد پاکستان اور مالدیپ کے درمیان اعلیٰ تعلیم، تحقیق اور علمی تعاون کو فروغ دینا ہے۔