میر رضا کیس، لاش اٹھانے والے ریسکیو اہلکاروں کے اہم انکشافات

کراچی (صداۓ سچ نیوز) کراچی میں میر رضا کیس میں لاش اٹھانے والے ریسکیو اہلکاروں نے جائے وقوعہ اور لاش کی حالت سے متعلق اہم انکشافات کیے ہیں۔

سماء سے گفتگو کرتے ہوئے ریسکیو اہلکاروں نے بتایا کہ میر رضا کی لاش جھاڑیوں سے گھری ہوئی جگہ سے ملی، جبکہ جائے وقوعہ کے آگے بڑے گملے رکھے ہوئے تھے اور اسے بند اور ڈھکا گیا تھا۔

ریسکیو اہلکاروں کے مطابق جائے وقوعہ کے اندر جانے کے لیے صرف ایک چھوٹا راستہ موجود تھا۔ لاش کافی خراب حالت میں تھی اور اس وقت بھی اس سے خون نکل رہا تھا۔

ریسکیو اہلکار جاوید نے بتایا کہ لاش کا جائزہ لینے پر اس پر گولی لگنے کا انکشاف ہوا۔ ان کے مطابق لاش اٹھاتے وقت تک کرائم سین یونٹ موقع پر موجود نہیں تھا۔

ریسکیو اہلکاروں کا کہنا تھا کہ پولیس نے فنگر پرنٹس لینے کی کوشش کی، تاہم انگلیاں درست حالت میں نہ ہونے کے باعث فنگر پرنٹس لینے میں کامیابی نہیں ہوسکی۔

اہلکاروں کے مطابق لاش اٹھانے کی کارروائی میں تقریباً ایک سے ڈیڑھ گھنٹہ لگا، جبکہ ریسکیو اہلکاروں کو میر رضا کی لاش ملنے کی اطلاع دی گئی تھی۔