آڈیٹر جنرل آف پاکستان نے اسلام آباد میں اے جی پی آڈٹ کمپلیکس کا افتتاح کردیا

اسلام آباد (صداۓ سچ نیوز) پبلک سیکٹر کے اداروں میں شفافیت، احتساب، مالیاتی نظم و ضبط اور گڈ گورننس کے فروغ میں آڈٹ ادارے کا اہم کردار ہوتا ہے۔ یہ بات آڈیٹر جنرل آف پاکستان مقبول احمد گوندل نےاسلام آباد میں اے جی پی آڈٹ کمپلیکس کی افتتاحی تقریب سے خطاب کرتے ہوئے کہی۔

مقبول احمد گوندل نے کہا کہ اے جی پی آڈٹ کمپلیکس کا افتتاح کام کی جگہ پر بہتر سہولیات کی فراہمی اور اسلام آباد میں آڈٹ ادارے کی آپریشنل صلاحیت کو مضبوط بنانے کی جانب ایک اہم اقدام ہے۔

آڈیٹر جنرل نے ادارہ جاتی صلاحیت و استعداد کار کو مضبوط بنانے اور آڈٹ افسران اور عملے کے لیے سازگار، جدید اور اچھی طرح سے آ راستہ کام کا ماحول فراہم کرنے کی اہمیت کو اجاگر کیا۔ انہوں نے آڈٹ ورک فورس کی پیشہ ورانہ صلاحیتوں کو بڑھانے کے لیے ڈیجیٹل اور جدید آلات، کام کرنے کے لیے سازگار سہولیات اور استعداد کار بڑھانے کے تربیتی پروگراموں کی فراہمی کے لیے ہر ممکن کوشش کر نے کے عزم کا اعادہ کیا

انہوں نے اپنے خطاب میں اس بات پر زور دیا کہ موثر آڈٹ، شفافیت، احتساب اور مالیاتی نظم و ضبط قومی معیشت کو مضبوط بنانے، عوامی وسائل کے تحفظ اور سرکاری خزانے کے تحفظ کے لیے کلیدی حیثیت رکھتے ہیں۔

آڈیٹر جنرل آف پاکستان نے مسجد اور ڈے کیئر سنٹر سمیت نئے قائم ہونے والے کمپلیکس کی سہولیات کا بھی دورہ کیا اور افسران اور عملے کے لیے جدید سہولیات کی فراہمی کو سراہا۔

قبل ازیں تقریب کا آغاز پرچم کشائی سے ہوا، جس کے بعد تلاوت قرآن پاک اور قومی ترانہ پیش کیا گیا۔ بعد ازاں آڈیٹر جنرل نے ربن کاٹ کر اور یادگاری تختی کی نقاب کشائی کے ذریعے آڈٹ کمپلیکس کا باقاعدہ افتتاح کیا۔

افتتاحی تقریب میں آڈیٹر جنرل آف پاکستان کے محکمہ کے سینئر افسران بشمول ڈائریکٹر جنرل آڈٹ (P&TS)، آڈٹ (پاور)، آڈٹ (PNR) اور آڈٹ (آب و ہوا کی تبدیلی اور ماحولیات) کے علاوہ دیگر اعلیٰ حکام اور معزز مہمانوں نے شرکت کی۔