سعودی عرب اور یمن کی فوج نے حوثیوں کیخلاف فوجی کارروائی کا منصوبہ بنالیا

غیر ملکی خبر ایجنسی کے مطابق منصوبے کے تحت  باب المندب کے ارد گرد کے علاقے پر محدود حملے، البیضا، مارب، تعز اور الجوف کے صوبوں میں متعدد محاذوں پر کو آرڈینیٹڈ بڑے حملے کیے جائیں گے۔

خبر ایجنسی کے مطابق سعودی عرب کی نگرانی میں ایک لاکھ سے زائد یمنی فوجی زمین پر پیش قدمی کریں گے جب کہ سعودی فضائیہ حملے کرے گی۔ ذرائع کے مطابق یہ کارروائی آنے والے چند ہفتوں میں شروع ہوسکتی ہے ۔ کارروائی کا مقصد باب المندب آبنائے اور بحیرہ احمر کے اہم شپنگ روٹ کو حوثیوں سے واپس لینا ہے۔

ذرائع نے خبر ایجنسی کو بتایا کہ امریکا پہلے ہی یمن میں سعودی کارروائیوں کے لیے انٹیلی جنس فراہم کر رہا ہے۔ اس کے علاوہ خطے کے بعض ممالک اور یورپی ممالک سعودی عرب کو زیادہ تر دفاعی نوعیت کی فوجی امداد دے رہے ہیں، تاہم سعودی اتحادیوں کی اس کارروائی میں براہ راست کردار ادا کرنے کی توقع نہیں ہے۔