روات اور ملحقہ علاقوں میں ایل پی جی گیس کی من مانی قیمتیں، 12 کلو سلنڈر 6700 روپے تک فروخت ہونے لگا

راولپنڈی (صدائے سچ نیوز) راولپنڈی کے علاقے روات اور اس سے ملحقہ آبادیوں میں ایل پی جی گیس کی قیمتوں میں مبینہ طور پر من مانا اضافہ کر دیا گیا ہے، جہاں گیس سلنڈر فروخت کرنے والے بعض دکاندار سرکاری نرخوں کو نظرانداز کرتے ہوئے صارفین سے بھاری رقوم وصول کر رہے ہیں۔

علاقہ مکینوں کے مطابق 12 کلوگرام ایل پی جی سلنڈر کی سرکاری قیمت تقریباً 3,500 سے 3,800 روپے بتائی جا رہی ہے، تاہم روات اور گردونواح میں یہی سلنڈر مبینہ طور پر 6,300 سے 6,700 روپے تک فروخت کیا جا رہا ہے۔ سرکاری نرخوں اور مارکیٹ میں وصول کی جانے والی قیمتوں کے درمیان اس قدر بڑے فرق نے غریب اور متوسط طبقے کی مشکلات میں مزید اضافہ کر دیا ہے۔

شہریوں کا کہنا ہے کہ مہنگائی کے باعث پہلے ہی گھریلو اخراجات پورے کرنا مشکل ہو چکا ہے، جبکہ ایل پی جی جیسی بنیادی ضرورت کی قیمتوں میں من مانا اضافہ عوام کے لیے شدید پریشانی کا باعث بن رہا ہے۔ خصوصاً وہ گھرانے جو قدرتی گیس کی عدم دستیابی کے باعث سلنڈر استعمال کرنے پر مجبور ہیں، اس صورتحال سے براہ راست متاثر ہو رہے ہیں۔

علاقہ مکینوں نے وزیراعلیٰ پنجاب محترمہ مریم نواز شریف سے اپیل کی ہے کہ وہ پنجاب بھر میں اشیائے ضروریہ کی قیمتوں پر نوٹس لینے کے ساتھ روات اور ملحقہ علاقوں میں ایل پی جی کی مبینہ ناجائز مہنگے داموں فروخت کا بھی فوری ازخود نوٹس لیں۔

شہریوں نے ضلعی انتظامیہ، محکمہ صنعت و تجارت اور متعلقہ حکام سے مطالبہ کیا ہے کہ ایل پی جی فروخت کرنے والے دکانداروں کے خلاف قیمتوں کی خلاف ورزی پر مؤثر کارروائی کی جائے، سرکاری نرخوں پر عمل درآمد یقینی بنایا جائے اور غریب عوام کو ناجائز منافع خوری سے نجات دلا کر حقیقی ریلیف فراہم کیا جائے۔