سینکڑوں گدی نشینوں کے دعوے مسترد، بری امام سرکارؒ کا کوئی سجادہ نشین نہیں، ڈپٹی کمشنر اسلام آباد

اسلام آباد (صدائے سچ خصوصی رپورٹ) خطۂ پوٹھوہار کی معروف روحانی شخصیت حضرت سید عبداللطیف کاظمی المعروف بری امام سرکارؒ کے دربار کی گدی نشینی اور سجادہ نشینی سے متعلق سامنے آنے والے متعدد دعوؤں پر اسلام آباد انتظامیہ نے واضح مؤقف اختیار کیا ہے کہ حضرت بری امام سرکارؒ کا کوئی گدی نشین یا سجادہ نشین مقرر نہیں ہے۔

ڈپٹی کمشنر اسلام آباد کی ہدایت پر بری امام سرکارؒ کے دربار کے داخلی راستے سمیت مختلف مقامات پر آگاہی بورڈز نصب کر دیے گئے ہیں۔ ان اقدامات کا مقصد زائرین اور عقیدت مندوں کو گدی نشینی یا سجادہ نشینی کے نام پر ممکنہ گمراہی اور دھوکے سے محفوظ رکھنا ہے۔

اسلام آباد انتظامیہ کے ایک افسر کے مطابق موضع نورپور شاہاں، جسے بری امام کے نام سے بھی جانا جاتا ہے، میں ایک عرصے سے متعدد افراد اور خاندان حضرت بری امام سرکارؒ کی گدی نشینی یا سجادہ نشینی کے دعوے کرتے آ رہے ہیں۔ ان دعویداروں میں بعض ایسے افراد بھی شامل ہیں جن کا حضرت بری امام سرکارؒ کے خاندان سے نہ تو نسبی تعلق ہے اور نہ ہی کوئی مستند روحانی نسبت ثابت ہے۔

انتظامیہ کے مطابق بعض غیرسید خاندان بھی گدی نشینی اور سجادہ نشینی کے دعوے کر رہے ہیں، حالانکہ حضرت بری امام سرکارؒ کا خاندانی تعلق ان کے آبائی علاقے کرسال سے ہے، جہاں آج بھی ان کا خاندان آباد ہے۔ آپ ساتویں امام موسیٰ کاظم علیہ السلام کی اولاد ہیں۔

نورپور شاہاں میں آباد خاندانوں کے بارے میں بتایا جاتا ہے کہ ان میں بڑی تعداد حضرت بری امام سرکارؒ کے عقیدت مندوں، خدام اور غلاموں کی اولادوں پر مشتمل ہے۔ تاہم، موجودہ تنازع محض عقیدت، خدمت یا غلامی کی نسبت تک محدود نہیں بلکہ بعض افراد کی جانب سے براہِ راست گدی نشین یا سجادہ نشین ہونے کے دعوے سے متعلق ہے۔

انتظامیہ کے مطابق بعض دعویداروں کے آباؤ اجداد ایسے بھی تھے جو حضرت بری امام سرکارؒ کے وصال کے کئی برس بعد نورپور شاہاں میں آ کر آباد ہوئے، اس کے باوجود ان کی جانب سے گدی نشینی یا سجادہ نشینی کے دعوے کیے جا رہے ہیں۔

ذرائع کے مطابق گدی نشینی اور سجادہ نشینی کے متضاد دعوؤں کے باعث بری امام سرکارؒ کے دربار پر آنے والے زائرین میں بعض اوقات ابہام پیدا ہوتا ہے، جبکہ مختلف افراد خود کو دربار کا حقیقی گدی نشین یا سجادہ نشین ظاہر کرتے ہیں۔

اسی صورتحال کے پیش نظر ڈپٹی کمشنر اسلام آباد نے زائرین کی رہنمائی اور انہیں ممکنہ غلط بیانی سے محفوظ رکھنے کے لیے دربار کے اطراف اور داخلی راستوں پر واضح اعلانات اور آگاہی بورڈز نصب کرانے کی ہدایت کی ہے۔

اسلام آباد انتظامیہ کے اس اقدام کے بعد حضرت بری امام سرکارؒ کی گدی نشینی اور سجادہ نشینی سے متعلق جاری دعوؤں پر ایک مرتبہ پھر سوالات اٹھ کھڑے ہوئے ہیں۔ انتظامیہ نے اپنے مؤقف کے ذریعے زائرین کو واضح پیغام دیا ہے کہ دربار کا انتظام و انصرام سرکاری محکمے کے پاس ہے اور کسی فرد کو سرکاری طور پر بری امام سرکارؒ کا گدی نشین یا سجادہ نشین تسلیم نہیں کیا گیا، سب دعویدار جعلی ہیں۔