تھرپارکر میں خشک سالی سے متاثرہ خاندانوں کی مالی معاونت کے لیے بی آئی ایس پی کا سندھ حکومت سے تعاون کا اعلان

مٹھی (صداۓ سچ نیوز) چیئرپرسن بینظیر انکم سپورٹ پروگرام (بی آئی ایس پی) سینیٹر روبینہ خالد نے کہا ہے کہ تھرپارکر میں خشک سالی سے متاثرہ خاندانوں کی مالی معاونت کے لیے بی آئی ایس پی سندھ حکومت کو اپنا ڈیٹا بیس اور ہر ممکن تعاون فراہم کرے گا۔

سندھ حکومت کی جانب سے تھرپارکر کو خشک سالی سے متاثرہ آفت زدہ علاقہ قرار دیے جانے کے بعد چیئرپرسن بی آئی ایس پی سینیٹر روبینہ خالد نے ضلع کا دورہ کیا، جہاں انہوں نے مٹھی، بدین اور عمرکوٹ میں صورتحال کا جائزہ لیا اور متاثرہ خاندانوں کو ہر ممکن تعاون کی یقین دہانی کرائی۔

ڈپٹی کمشنر آفس مٹھی میں میڈیا سے گفتگو کرتے ہوئے سینیٹر روبینہ خالد نے کہا کہ سندھ حکومت خشک سالی سے متاثرہ خاندانوں کی مالی معاونت کے لیے بی آئی ایس پی کے ڈیٹا بیس سے استفادہ کرے گی، جبکہ ادارہ اس سلسلے میں مکمل تعاون فراہم کرے گا۔

انہوں نے بتایا کہ تھر اور عمرکوٹ میں ایک، ایک موبائل رجسٹریشن وین سروے اور رجسٹریشن کے عمل میں معاونت فراہم کر رہی ہے، جبکہ تھرپارکر کے متاثرہ علاقوں کے لیے ایک اضافی موبائل رجسٹریشن وین بھی مختص کی جائے گی۔

چیئرپرسن بی آئی ایس پی نے کہا کہ متاثرہ خاندانوں کے لیے اضافی مالی امداد کی فراہمی کے معاملے پر صدرِ مملکت اور وزیراعظم سے بھی بات کی جائے گی۔

انہوں نے مزید بتایا کہ امدادی رقوم کی شفاف تقسیم اور شکایات کے فوری ازالے کے لیے ڈپٹی کمشنر آفس میں کنٹرول روم قائم کیا جائے گا۔ مستحقین کے ڈیجیٹل والٹ اکاؤنٹس کھولے جا رہے ہیں، جبکہ چھ بینکوں کے ذریعے ادائیگیاں کی جا رہی ہیں۔ انہوں نے واضح کیا کہ امدادی رقوم میں ناجائز کٹوتیوں اور بدعنوانی میں ملوث عناصر کے خلاف کارروائی کی جائے گی۔

اس موقع پر ڈائریکٹر جنرل بی آئی ایس پی ثناء اللہ رند نے بریفنگ دیتے ہوئے بتایا کہ تھرپارکر کے ساتوں تعلقوں میں سروے اور رجسٹریشن دفاتر فعال ہیں۔ ضلع میں بی آئی ایس پی سے مستفید ہونے والی خواتین کی تعداد تقریباً ایک لاکھ 26 ہزار، جبکہ وسیلہ پروگرام کے تحت مالی معاونت حاصل کرنے والے بچوں کی تعداد تقریباً ایک لاکھ 52 ہزار ہے۔

قبل ازیں سینیٹر روبینہ خالد نے ڈپٹی کمشنر آفس مٹھی میں منتخب نمائندوں اور ضلعی انتظامیہ کے افسران کے اجلاس کی صدارت کی۔ اجلاس میں خشک سالی کی صورتحال، امدادی رقوم میں ناجائز کٹوتیوں، ڈیوائس ہولڈرز کے خلاف شکایات اور دیگر متعلقہ امور پر بریفنگ دی گئی۔

اجلاس میں اراکین قومی و صوبائی اسمبلی، سینیٹرز، ڈویژنل کمشنر میرپورخاص شمیر خان بھٹو، ڈپٹی کمشنر تھرپارکر عبدالحلیم جاگیرانی، ضلعی کونسل کے چیئرمین ڈاکٹر غلام حیدر سمیجو، پیپلز پارٹی کے مقامی رہنماؤں، ڈی جی بی آئی ایس پی ثناء اللہ رند، بی آئی ایس پی کنسلٹنٹ نوید خان اور متعلقہ سرکاری افسران نے شرکت کی۔