قدرت اللہ شہاب کا حیرت انگیز روحانی واقعہ؛ حضرت فاطمۃ الزہرا سلام اللہ علیہا سے منسوب پیغام نے انہیں سرشار کر دیا

جرمنی میں مقیم بھابھی نے خواب میں حضرت فاطمۃ الزہرا سلام اللہ علیہا کی زیارت اور قدرت اللہ شہاب کی دعا کی منظوری کا پیغام ملنے کا واقعہ خط میں بیان کیا؛ دلچسپ روداد شہاب نامہ میں محفوظ ہے

اسلام آباد (صدائے سچ نیوز- خصوصی رپورٹ) معروف پاکستانی ادیب اور سابق بیوروکریٹ قدرت اللہ شہاب نے اپنی شہرۂ آفاق خودنوشت شہاب نامہ میں ایک منفرد روحانی واقعہ بیان کیا ہے، جس میں انہوں نے حضرت سیدہ فاطمۃ الزہرا سلام اللہ علیہا سے عقیدت، سلسلۂ اویسیہ سے فیض حاصل کرنے کی خواہش اور ایک غیر معمولی خواب کا ذکر کیا ہے۔

قدرت اللہ شہاب لکھتے ہیں کہ ایک مرتبہ ایک دور افتادہ گاؤں کی بوسیدہ مسجد میں نمازِ جمعہ کے دوران خطیب نے رسول اکرم حضرت محمد مصطفیٰ ﷺ اور آپ کی صاحبزادی حضرت فاطمۃ الزہرا سلام اللہ علیہا کے درمیان محبت و احترام کا ایک واقعہ بیان کیا، جس نے ان کے دل پر گہرا اثر چھوڑا۔

نماز کے بعد انہوں نے مسجد میں نوافل ادا کیے اور اللہ تعالیٰ سے دعا کی کہ اگر سلسلۂ اویسیہ حقیقت ہے تو انہیں اس سے روحانی فیض حاصل کرنے کی توفیق عطا فرمائی جائے۔ انہوں نے یہ التجا بھی کی کہ اللہ تعالیٰ کی اجازت سے حضرت فاطمۃ الزہرا سلام اللہ علیہا ان کی درخواست اپنے والد گرامی ﷺ کی بارگاہ میں پیش فرما دیں۔

یہ بھی پڑھیں: سیدہ فاطمہ زہرا سلام اللہ علیہا کی آخری آرام گاہ کہاں؟ جنت البقیع یا روضۂ رسولؐ؟ حضرت عیسیٰؑ کی ممکنہ تدفین سے جڑا ایک حیران کن تاریخی انکشاف

شہاب کے مطابق انہوں نے اس دعا کا ذکر کسی سے نہیں کیا۔ تقریباً چھ سے سات ہفتے بعد انہیں جرمنی میں مقیم اپنی مسلمان بھابھی کا ایک خط موصول ہوا، جس میں انہوں نے خواب میں حضرت فاطمۃ الزہرا سلام اللہ علیہا کی زیارت کا ذکر کیا۔

خط میں خواب سے منسوب پیغام کے مطابق حضرت فاطمۃ الزہرا سلام اللہ علیہا نے فرمایا:

’’اپنے دیور قدرت اللہ شہاب کو بتا دو کہ میں نے اس کی درخواست اپنے برگزیدہ والد گرامی ﷺ کی خدمت میں پیش کر دی تھی، انہوں نے ازراہِ نوازش اسے منظور فرما لیا ہے۔‘‘

قدرت اللہ شہاب لکھتے ہیں کہ یہ خط پڑھ کر وہ خوشی اور حیرت کی غیر معمولی کیفیت میں مبتلا ہو گئے۔ انہیں یہ تصور ہی بے حد مسرت دے رہا تھا کہ ان کا ذکر ایک ایسی مقدس نسبت کے ساتھ ہوا۔

اپنی اس قلبی کیفیت کو بیان کرتے ہوئے انہوں نے لکھا:

’’مجھ سے بہتر ذکر میرا ہے کہ اس محفل میں ہے!‘‘

شہاب نامہ کے مطابق اس واقعے کے بعد کچھ عرصے تک انہیں خواب میں مختلف بزرگ صورت ہستیاں بھی دکھائی دیتی رہیں۔

یہ واقعہ قدرت اللہ شہاب کی ذاتی روحانی یادداشتوں، محبتِ اہلِ بیت اور سلسلۂ اویسیہ سے وابستہ ان کی جستجو کا ایک منفرد بیان ہے۔

حوالہ: شہاب نامہ، قدرت اللہ شہاب، صفحہ 1180