علی خامنائی ملتِ اسلامیہ کے ضمیر کی آواز ہیں، علامہ ایاز علی قمی

حیدرآباد (صدائے سچ نیوز) رہبرِ معظم اسلامی جمہوری ایران سید علی خامنائی محض ایران کے ہی مذہبی و سیاسی قائد نہیں بلکہ وہ پوری ملتِ اسلامیہ کے ضمیر کی آواز ہیں،ان کی قیادت صرف اقتدار سے نہیں بلکہ ولایتِ علی عہ سے جُڑا ہوا ایک روحانی و فکری تسلسل ہے۔

ان خیالات کا اظہار معروف شیعہ عالم علامہ ایاز علی قمی نے گزشتہ روز زوار عبدالستار درس کی رہائشگاہ پر میڈیا نمائندگان سے گفتگو کرتے ہوئے کیا۔ انہوں نے کہا کہ رہبرِ معظم نے اپنے عمل سے ثابت کیا ہے کہ دشمن کا مقابلہ کھوکھلے نعروں سے نہیں بلکہ استقامت، بصیرت اور قوتِ ایمانی سے کیا جاتا ہے۔

عراق کی جانب سے مسلط کی گئی آٹھ سالہ جنگ، جس میں امریکہ سمیت جملہ سامراجی قوتیں شریک تھیں وہ مل کر بھی ایران کے انقلابِ اسلامی کو نہیں جھکا سکیں، اس کے بعد اسرائیل کی 12 روزہ جارحیت بھی ایرانی حوصلے کے سامنے بے وقعت ثابت ہوئی اور یہودیوں کو خیبر والی شکست یاد دلائی گئی۔

علامہ ایاز علی قمی نے کہا کہ آج امریکی صدر ڈونلڈ ٹرمپ دھمکیاں تو دے رہا ہے لیکن اس کے چہرے سے خوف کی جھلک نمایاں چھلک رہی ہے جبکہ رہبرِ معظم مسکراتے ہوئے یہی کہہ رہے ہیں کہ، ہم میدان چھوڑنے والے نہیں بلکہ انشاء اللہ میدان میں ڈٹ کر دشمن کو شکست دینے والے ثابت ہونگے۔

انہوں نے کہا کہ امریکہ اور اس کا اتحادی میڈیا رہبرِ معظم کی جانب سے ملک چھوڑنے کی تیاری والی پروپیگنڈہ کرنے میں مصروف ہے لیکن انہیں یاد رکھنا چاہیئے کہ علی عہ والوں کے لئے میدان چھوڑ جانا بزدلی اور دشمن کو میدان سے بھگانا ہی بہادری تصور کی جاتی ہے۔ دنیا بھر کے شیعہ رہبرِ معظم کے ساتھ ہیں اس لئے امریکہ اور اس کے اتحادی میڈیا کو ایسی گمراہ کن پروپیگنڈہ سے گریز کرتے ہوئے یہ یاد رکھنا چاہیئے کہ تاریخ ہمیشہ حق اور باطل کے فرق کو نمایاں رکھتی ہے۔