وفاقی حکومت کا بجلی کا بنیادی ٹیرف برقرار رکھنے کا فیصلہ

اسلام آباد (صدائے سچ نیوز) وفاقی حکومت نے ملک بھر کے لئے بجلی کا بنیادی ٹیرف برقرار رکھنے کا فیصلہ کیا ہے۔

نیشنل الیکٹرک پاور ریگولیٹری اتھارٹی (نیپرا) کے مطابق گھریلو صارفین کیلئے زیادہ سے زیادہ بجلی کا ٹیرف 47 روپے 69 پیسے فی یونٹ پر برقرار رکھنے کی تجویزدی گئی ہے، نیپرا نے اس حوالے سے اپنی سفارشات وفاقی حکومت کو بھجوا دی ہیں۔

نیپرا کے مطابق پروٹیکٹڈ گھریلو صارفین کے لئے ایک سے 100 یونٹ تک بجلی کا ٹیرف 10 روپے 54 پیسے فی یونٹ جبکہ 101 سے 200 یونٹ تک پروٹیکٹڈ صارفین کا ٹیرف 13 روپے 01 پیسے فی یونٹ برقرار رکھنے کی تجویز ہے۔

اسی طرح نان پروٹیکٹڈ گھریلو صارفین کے لیے ایک سے 100 یونٹ تک بجلی کا ٹیرف 22 روپے 44 پیسے جبکہ 101 سے 200 یونٹ تک 28 روپے 91 پیسے فی یونٹ برقرار رکھنے کی سفارش کی گئی ہے۔

نیپرا کے مطابق 201 سے 300 یونٹ تک بجلی استعمال کرنیوالے صارفین کے لئے فی یونٹ ٹیرف 33 روپے 10 پیسے، 301 سے 400 یونٹ کیلئے 37 روپے 99 پیسے اور 401 سے 500 یونٹ کیلئے 40 روپے 22 پیسے برقرار رکھنے کی تجویز دی گئی ہے۔

نیپرا نے مزید بتایا کہ لائف لائن گھریلو صارفین کیلئے ماہانہ 50 یونٹ تک بجلی کا ٹیرف 3 روپے 95 پیسے جبکہ 51 سے 100 یونٹ تک کے لئے 7 روپے 74 پیسے فی یونٹ برقرار رکھنے کی تجویز ہے۔

اتھارٹی کے مطابق یکساں ٹیرف کی درخواست سے متعلق فیصلہ وفاقی حکومت کو ارسال کردیا گیا ہے، جس پر حتمی منظوری دی جائے گی۔