ریاض، تیل کمپنی آرامکو کی عمارت پر حملہ، عمارت کے ایک فلور کو نقصان پہنچا

ریاض (صداۓ سچ نیوز) سعودی عرب کی وزارتِ توانائی نے بتایا ہے کہ اتوار کے روز ریاض میں سعودی آرامکو کی عمارت پر حملے کی کوشش کے نتیجے میں اسے معمولی نقصان پہنچا تاہم اس واقعے میں کوئی جانی نقصان یا کوئی زخمی ہوا۔

سعودی وزارتِ توانائی نے واقعے کی تصدیق کرتے ہوئے کہا کہ حملے کے نتیجے میں عمارت پر ملبہ گرنے سے اس کی ایک منزل کو نقصان پہنچا، تاہم کوئی جانی نقصان نہیں ہوا۔

دوسری جانب سعودی اتحاد کے ترجمان نے بتایا کہ حوثی باغیوں نے ریاض کو نشانہ بنانے کے لیے دو بیلسٹک اور ایک کروز میزائل داغے، تاہم سعودی فضائی دفاعی نظام نے انہیں اہداف تک پہنچنے سے پہلے ہی تباہ کردیا۔ ترجمان کے مطابق ایک کروز میزائل جنوبی علاقے جبکہ بیلسٹک میزائل مشرقی علاقے میں مار گرایا گیا۔

حملوں کے خدشے کے پیش نظر دمام، ظہران، بقیق اورالہفوف میں پیشگی وارننگ جاری کی گئی تھی۔ عرب میڈیا کے مطابق خطرہ ٹلنے کے بعد چاروں شہروں میں الرٹ واپس لے لیا گیا۔